റേസ് വാക്കിൽ ഇന്ത്യയുടെ മിന്നും താരം; മലയാളി ഒളിംപ്യൻ കെടി ഇർഫാൻ വിരമിച്ചു

മലപ്പുറം: ഇന്ത്യയുടെ റേസ് വാക്കറും മലയാളി ഒളിംപ്യനുമായ കെടി ഇർഫാൻ അത്‍‌ലറ്റിക്സിൽ നിന്നു വിരമിച്ചു. 2012 ലെ ലണ്ടൻ, 2020ലെ ടോക്യോ ഒളിംപിക്സുകളിൽ ഇന്ത്യയെ പ്രതിനിധീകരിച്ച് നടത്ത മത്സരത്തിൽ പങ്കെടുത്ത താരമാണ് ഇർഫാൻ. ഇന്ത്യ റേസ് വാക്കിൽ സംഭാവന ചെയ്ത മികച്ച താരങ്ങളിലൊരാളാണ് അത്‍ലറ്റിക്സിന്റെ പടിയിറങ്ങുന്നത്.

20 കിലോമീറ്റർ നടത്തത്തിൽ ദേശീയ റെക്കോർഡിനുടമയാണ് ഇർഫാൻ. മലപ്പുറം സ്വദേശിയാണ്.

ലണ്ടൻ ഒളിംപിക്സിൽ 20 കിലോമീറ്റർ നടത്തത്തിൽ ഇർഫാൻ മെഡലൊന്നും നേടിയില്ല. എന്നാൽ താരം ദേശീയ റെക്കോർഡ് സ്ഥാപിച്ചാണ് ഫിനിഷ് ചെയ്തത്. 1.20.21 സെക്കൻഡിലാണ് താരം പുതിയ ദേശീയ റെക്കോർഡ് സ്ഥാപിച്ചത്. പത്താം സ്ഥാനത്താണ് അന്ന് ഫിനിഷ് ചെയ്തത്.

2012ലെ ഫെഡറേഷൻ കപ്പ് അത്‍ലറ്റിക്സിൽ ഇർഫാൻ സ്വർണം സ്വന്തമാക്കിയിരുന്നു. അന്ന് 1.22.14 സെക്കൻഡിൽ ഫിനിഷ് ചെയ്ത് താരം മീറ്റ് റെക്കോർഡോടെയാണ് സുവർണ നേട്ടം. അതേ വർഷം തന്നെ റേസ് വാക്കിങ് ലോകകപ്പിലും അദ്ദേഹം മികച്ച പ്രകടനം നടത്തി. 1.22.09 സെക്കൻഡിൽ ഫിനിഷ് ചെയ്താണ് ഇർഫാൻ ഒളിംപിക്സ് യോ​ഗ്യത നേടിയത്.