കുരിശ് പൊളിച്ചത് അധാര്‍മികമെന്ന് യുഡിഎഫ്
By സമകാലികമലയാളം ഡെസ്‌ക്‌ | Published: 21st April 2017 12:39 PM |
Last Updated: 21st April 2017 05:36 PM | A+A A- |
തിരുവനന്തപുരം: മൂന്നാറിലെ പാപ്പാത്തിച്ചോലയില്‍ അനധികൃതമായി ഭൂമി കയ്യേറി സ്ഥാപിച്ച കുരിശ് പൊളിച്ചത് അധാര്‍മികമെന്ന് യുഡിഎഫ് കണ്‍വീനര്‍ പിപി തങ്കച്ചന്‍. ക്രൈസ്തവ വിശ്വാസികള്‍ക്ക് മാനസികമായി പ്രയാസമുണ്ടാക്കി. മുഖ്യമന്ത്രി അറിഞ്ഞില്ലെന്ന് പറഞ്ഞാല്‍ ആരും വിശ്വസിക്കില്ല. തങ്കച്ചന്‍ പറഞ്ഞു.
ഇന്നലെ കുരിശ് നീക്കിയതിനെതിരെ മുഖ്യമന്ത്രിയും രംഗത്ത് വന്നിരുന്നു. പൊളിക്കലല്ല സര്‍ക്കാര്‍ നയം, ഏറ്റെടുത്താല്‍ മതിയെന്നായിരുന്നു മുഖ്യമന്ത്രി ജില്ലാ ഭരണകൂടത്തെ വിളിച്ച് അതൃപ്തി പ്രകടിപ്പിച്ചത്.കുരിശു പൊളിച്ച നടപടി ജാഗ്രതക്കുറവാണ് തെളിയിക്കുന്നത്. ഒഴിപ്പിക്കല്‍ നടപടിയില്‍ കൂടിയാലോചന ആവശ്യമാണെന്നും മുഖ്യമന്ത്രി പറഞ്ഞു. സര്‍ക്കാര്‍ ഭൂമിയാണെന്ന് ഉറപ്പുണ്ടെങ്കില്‍ ആ ഭൂമിയില്‍ സര്‍ക്കാര്‍ ബോര്‍ഡ് വച്ചാല്‍ മതിയല്ലോ എന്നും മുഖ്യമന്ത്രി ചോദിച്ചിരുന്നു.
എന്നാല്‍ കുരിശ് പൊളിച്ചതില്‍ തെറ്റില്ലെന്നും കയ്യേറ്റങ്ങള്‍ ഇനിയും ഒഴിപ്പിക്കുമെന്നും റവന്യു മന്ത്രി ഇ ചന്ദ്രശേഖരന്‍ പറഞ്ഞു. ഇന്ന് കുരിശ് സ്ഥാപിച്ച സ്പിര്റ്റ് ഇന്‍ ജീസസിനെതിരെ റവന്യു വകുപ്പ് കേസെടുത്തിട്ടുണ്ട്.
