കൊച്ചി: മന്ത്രി എം.എം.മണിയുടെ പ്രസ്താവനയില് നിന്ന് വമിക്കുന്ന ദുര്ഗന്ധം നാടിനെ മുഴുവന് നാണം കെടുത്തുന്നതാണെന്ന് നടി മഞ്ജു വാര്യര്. രാജ്യം ശ്രദ്ധിക്കുകയും ഒരു പാട് പേര് ഒപ്പം നില്ക്കുകയും ചെയ്ത പോരാട്ടമായിരുന്നു പെമ്പിളൈ ഒരുമയുടേത്. അതിനെ ഏറ്റവും തരം താഴ്ന്ന രീതിയില് പരിഹസിച്ചതിലൂടെയും പ്രവര്ത്തകരെ സ്വഭാവഹത്യ നടത്തിയതിലൂടെയും മന്ത്രി അപമാനിച്ചത് ആത്മാഭിമാനത്തോടെ നിവര്ന്നു നില്കാന് ശ്രമിക്കുന്ന എല്ലാ സ്ത്രീകളേയുമാണെന്ന് മഞ്ജു വാര്യര് ഫേസ്ബുക്ക് പോസ്റ്റിലൂടെ പ്രതികരിച്ചു.
ആര്ക്കും നാവുകൊണ്ടു പോലും അപമാനിക്കാനുള്ള വസ്തുവല്ല സ്ത്രീ. അത് സമൂഹത്തോട് വിളിച്ചു പറയേണ്ട ബാധ്യതയുളളയാളാണ് ഒരു മന്ത്രി. വെറുമൊരു ഖേദപ്രകടനത്തിനുമപ്പുറം ഇനി ഇത്തരം വാക്കുകള് തന്നില് നിന്ന് ഉണ്ടാകില്ലെന്ന ഉറപ്പാണ് എം.എം.മണിയില് നിന്ന് പൊതുസമൂഹം പ്രതീക്ഷിക്കുന്നത്. ആത്മാഭിമാനത്തിന്റെ വീണ്ടെടുപ്പിനായുള്ള സമരത്തില് പെമ്പിളൈ ഒരുമയ്ക്കൊപ്പമാണെന്നും മഞ്ജു ഫേസ്ബുക്ക് പോസ്റ്റിലൂടെ വ്യക്തമാക്കുന്നു.
ഒരുപാട് ജനകീയ പോരാട്ടങ്ങള്ക്ക് നേതൃത്വം കൊടുക്കുകയും എന്നും ജനങ്ങള്ക്കൊപ്പം നില്കുകയും ചെയ്യുന്ന ഒരു പ്രസ്ഥാനത്തിന്റെ പ്രതിനിധിയായ അദേഹത്തിന് എങ്ങനെയിങ്ങനെ പറയാന് കഴിയുന്നു എന്നത് അത്ഭുതപ്പെടുത്തുന്നതാണെന്നും മഞ്ജു ഫേസ്ബുക്ക് പോസ്റ്റില് കുറിക്കുന്നു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ