തിരുവനന്തപുരം: കൗമാരക്കാരെ ആത്മഹത്യയിലേക്ക് തള്ളിവിടുന്ന ബ്ലൂവെയ്ല് ഗെയിം ഡൗണ്ലോഡ് ചെയ്ത ചിലര് പൊലീസ് നിരീക്ഷണത്തിലാണെന്ന് മുഖ്യമന്ത്രി പിണറായി വിജയന് അറിയിച്ചു. നിയമസഭയില് വെച്ചാണ് അദ്ദേഹം ഈ കംപ്യൂട്ടര് ഗെയിമിനെക്കുറിച്ച് പ്രതികരിച്ചത്.
ഈ ഗെയിം രാജ്യത്ത് നിരോധിക്കാന് കേന്ദ്ര സര്ക്കാരിനേ അധികാരമുള്ളൂ. ഇത് നിരോധിക്കണമെന്ന ആവശ്യം സംസ്ഥാന സര്ക്കാര് ഉന്നയിക്കുമെന്ന് രാജു എബ്രഹാമിന്റെ സബ്മിഷന് മറുപടിയായി മുഖ്യമന്ത്രി അറിയിച്ചു. ഇക്കാര്യത്തില് മാതാപിതാക്കളും കൂടുതല് ശ്രദ്ധിക്കണമെന്നും മുഖ്യമന്ത്രി പറഞ്ഞു.
കളിക്കുന്നവരെ ആത്മഹത്യയ്ക്കു പ്രേരിപ്പിക്കുന്ന ഈ ഗെയിം ഒട്ടേറെ രാജ്യങ്ങളില് നിരോധിച്ചിട്ടുണ്ട്. വിവിധ രാജ്യങ്ങളിലായി 530 പേര് ഇത്തരത്തില് ജീവനൊടുക്കിയെന്നാണു റിപ്പോര്ട്ട്. മുംബൈയില് കഴിഞ്ഞദിവസം കെട്ടിടത്തിനു മുകളില്നിന്നു ചാടി ജീവനൊടുക്കിയ പതിനാലുകാരന് മന്പ്രീത് സിങ് സഹാനി ഈ ഓണ്ലൈന് കളിയുടെ ഇരയാണെന്നു പൊലീസിന് സംശയമുണ്ട്.
മൈന്ഡ് മാനിപ്പുലേറ്റിങ് ഗെയിമായ ബ്ലൂ വെയ്ല് കളിക്കുന്നയാളിന്റെ മനസിനെ പതുക്കെ പതുക്കെ നിയന്ത്രിച്ച് അവസാനം ആത്മഹത്യയിലേക്ക് തള്ളിവിടുന്നതാണ് രീതി. ഇത്തരത്തില് നൂറോളം പേര് റഷ്യയില് മാത്രം മരണപ്പെട്ടെന്നാണ് റിപ്പോര്ട്ട്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ