മൂന്നാര്‍: നിര്‍ദിഷ്ട കുറിഞ്ഞി ഉദ്യാനത്തിലെ നിയമാനുസൃത കുടിയേറ്റക്കാരെ ഒഴിപ്പിക്കില്ലെന്ന് റവന്യൂമന്ത്രി ഇ ചന്ദ്രശേഖരന്‍. കുറിഞ്ഞി ഉദ്യാനം വരുന്നു എന്ന് അറിഞ്ഞതുമുതല്‍ ഇവിടെയുളള ജനങ്ങള്‍ ആശങ്കയിലാണ്. ഈ ആശങ്കയ്ക്ക്് ഒരു അടിസ്ഥാനവുമില്ലെന്നും ഇ ചന്ദ്രശേഖരന്‍ മാധ്യമങ്ങളോട് പറഞ്ഞു. നിയമാനുസൃത രേഖകളുളള ഒരു കുടിയേറ്റക്കാരനെയും സര്‍ക്കാര്‍ ഒഴിപ്പിക്കില്ല. അവരുടെ ആശങ്ക അകറ്റുന്നതിനാണ് മന്ത്രിതല സമിതി സന്ദര്‍ശനം നടത്തുന്നതെന്നും മന്ത്രി പറഞ്ഞു.
അതേസമയം കുറിഞ്ഞി ഉദ്യാനം സംരക്ഷിക്കേണ്ടതും സര്‍ക്കാരിന്റെ കടമയാണ്. അതിനാവശ്യമായ നടപടികള്‍ സ്വീകരിക്കും. ഇതിന്റെ ഭാഗമായി സ്ഥലത്ത് പരിശോധന നടത്താന്‍ വരുന്ന ഉദ്യോഗസ്ഥരുമായി സഹകരിക്കണമെന്നും മന്ത്രി അഭ്യര്‍ത്ഥിച്ചു. സന്ദര്‍ശനത്തിന് പിന്നാലെ തീരുമാനങ്ങള്‍ ഉണ്ടാകുമെന്നും മാധ്യമങ്ങളുടെ ചോദ്യത്തിന് മന്ത്രി മറുപടി പറഞ്ഞു. മുഖ്യമന്ത്രി വിളിച്ചുചേര്‍ത്ത യോഗത്തിന്റെ അടിസ്ഥാനത്തില്‍ ആവശ്യമായ തീരുമാനങ്ങള്‍ സര്‍ക്കാര്‍ തലത്തില്‍ സ്വീകരിക്കും. അതില്‍ ഒരു സംശയത്തിന്റെയും ആവശ്യമില്ലെന്നും മന്ത്രി കൂട്ടിച്ചേര്‍ത്തു. നിര്‍ദിഷ്ട കുറിഞ്ഞി ഉദ്യാനവുമായി ബന്ധപ്പെട്ട് പരാതികള്‍ ബോധിപ്പിക്കാന്‍ ജനപ്രതിനിധികളുടെ യോഗം നാളെ ചേരും.
നീലകുറിഞ്ഞി ഉദ്യാനത്തിന്റെ അതിര്‍ത്തി പുനര്‍നിര്‍ണിക്കുന്നതിന്റെ ഭാഗമായി സന്ദര്‍ശനം നടത്തുന്ന മന്ത്രിതലസമിതിയില്‍ റവന്യൂ മന്ത്രി ഇ ചന്ദ്രശേഖരനൊടൊപ്പം വനം വകുപ്പ് മന്ത്രി കെ രാജുവും, മന്ത്രി എം എം മണിയും സംഘത്തിലുണ്ട്.കുറിഞ്ഞി ഉദ്യാനത്തിന്റെ സെറ്റില്‍മെന്റ് ഓഫീസര്‍ കൂടിയായ ദേവികുളം സബ് കളക്ടര്‍ വി ആര്‍ പ്രേംകുമാര്‍, മൂന്നാര്‍ വൈല്‍ഡ് ലൈഫ് വാര്‍ഡന്‍ ആര്‍ ലക്ഷ്മി എന്നിവരും ഇവര്‍ക്കൊപ്പമുണ്ട്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
