കൊച്ചി: മുന് ഡിജിപി ടിപി സെന്കുമാര് സമകാലിക മലയാളത്തിന് നല്കിയ അഭിമുഖത്തില് നടി ആക്രമിക്കപ്പെട്ട സംഭവത്തില് മോശം പരാമര്ശം നടത്തിയെന്ന് ആരോപിച്ച് സിനിമയിലെ സ്ത്രീകളുടെ കൂട്ടായ്മയായ വിമന് ഇന് സിനിമ കളക്ടീവ് രംഗത്ത്. സെന്കുമാറിന്റെ വാക്കുകള് തങ്ങളെ ഞെട്ടിച്ചുവെന്നും ഡിജിപി എന്ന നിലയില് അന്തസില്ലാത്ത കാര്യങ്ങളാണ് അദ്ദേഹം പറഞ്ഞതെന്നും സംഘടന ഫെയ്സ്ബുക്കില് വ്യക്തമാക്കി. സെന്കുമാറിനെതിരെ നിയമനടപടി ആവശ്യപ്പെട്ട് വനിതാ കമ്മീഷനെ സമീപിക്കുമെന്നും സംഘടന അഭിപ്രായപ്പെട്ടും
ഫെയ്സ്ബക്ക് പോസ്റ്റിന്റെ പൂര്ണരൂപം
ഞങ്ങളുടെ സഹപ്രവര്ത്തക അക്രമിക്കപ്പെട്ടതുമായി ബന്ധപ്പെട്ട് മുന് പോലീസ് മേധാവി ഒരു വാരികക്ക് നല്കിയ അഭിമുഖത്തിത്തിനിടെ അദ്ദേഹം ഫോണില് നടത്തിയ ചില പരാമര്ശങ്ങള് ഞങ്ങളുടെ സഹപ്രവര്ത്തകയെയും ഒപ്പം ചലച്ചിത്ര മേഖലയില് തൊഴിലെടുക്കുന്ന എല്ലാ സ്ത്രീകളെയും അപമാനിക്കുന്നതാണ്. പ്രസ്തുത കേസിന്റെ ചുമതലക്കാരനായിരുന്ന പോലീസ് മേധാവിയാണ് ഇത്രയും ഹീനവും സ്ത്രീവിരുദ്ധവുമായ പരാമര്ശം നടത്തിയതെന്ന വസ്തുത ഞെട്ടലോടെയാണ് ഞങ്ങള് കേട്ടത്. മലയാള ചലച്ചിത്ര മേഖലയില് തൊഴിലെടുക്കുന്ന സ്ത്രീകളുടെ അന്തസ്സും അവകാശങ്ങളും ഉയര്ത്തി പിടിക്കാനുള്ള പോരാട്ടങ്ങള്ക്ക് നേതൃത്വവും ദിശാബോധവും നല്കുന്ന ഒരു കൂട്ടായ്മ എന്ന നിലയില് മുന് പോലീസ് മേധാവിയുടെ മാന്യതയില്ലാത്ത, അന്തസ്സില്ലാത്ത ഈ പരാമര്ശത്തെ ഞങ്ങള് അങ്ങേയറ്റം അപലപിക്കുന്നു. മാത്രവുമല്ല, ഒരു ഭാഗത്ത് പോലീസ് സേന തങ്ങളുടെ ഇച്ഛാശക്തിയും ആത്മവീര്യവും തെളിയിച്ചു കൊണ്ട് പ്രസ്തുത കേസ് അന്വേഷണവുമായി മുന്നോട്ട് പോകുന്ന സാഹചര്യത്തില് മുന് പോലീസ് മേധാവിയുടെ ഭാഗത്ത് നിന്നുണ്ടായ ഇത്തരം പരാമര്ശങ്ങള് പോലീസ് സേനക്ക് തന്നെ അപമാനമാണെന്നും ഞങ്ങള് കരുതുന്നു. അതിക്രമത്തെ സധൈര്യം അതിജീവിച്ച ഞങ്ങളുടെ സഹപ്രവ'ത്തകയെ അപകീര്ത്തിപ്പെടുത്തുന്ന ഇത്തരം പരാമര്ശങ്ങള് പ്രസിദ്ധീകരിക്കുന്നതില് നിന്ന് ഒഴിഞ്ഞു നില്ക്കണമെന്ന് മാധ്യമങ്ങളോടും wcc അഭ്യര്ത്ഥിക്കുന്നു. മുന് പോലീസ് മേധാവിയുടെ ഇത്തരം പരാമര്ശങ്ങള്ക്കെതിരെ നിയമ നടപടി ആവശ്യപ്പെട്ടു കൊണ്ട് wcc വനിതാ കമ്മിഷനെ സമീപിക്കും'
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ