പാലക്കാട്: ചെര്‍പ്പുളശേരിയില്‍ രണ്ടാം ക്ലാസുകാരിയെ പീഡിപ്പിച്ച സംഭവത്തില്‍ അധ്യാപകനെ സസ്‌പെന്‍ഡ് ചെയ്തു. മിഠായി വാങ്ങി കൊടുക്കാം എന്ന് പറഞ്ഞ് അധ്യാപകന്‍ രണ്ടാം ക്ലാസ് വിദ്യാര്‍ഥിനിയെ സ്‌കൂളിന്റെ പുറകില്‍ കൊണ്ടുപോയി പീഡിപ്പിക്കുകയായിരുന്നു. സംഭവത്തില്‍ ചെര്‍പ്പുളശേരി ഗവ യുപി സ്‌കൂള്‍ അധ്യാപകന്‍ വിപി ശശികുമാറിനെ വിദ്യാഭ്യാസ വകുപ്പ് സസ്‌പെന്‍ഡ് ചെയ്തു. സംഭവത്തെക്കുറിച്ച് പോലീസും പ്രധാനാധ്യാപികയും നല്‍കിയ റിപ്പോര്‍ട്ടിന്റെ അടിസ്ഥാനത്തിലാണ് ഇയാളെ വിദ്യാഭ്യാസ ഉപഡയറക്ടര്‍ സസ്‌പെന്‍ഡ് ചെയ്തത്.
അധ്യാപകനെതിരെ പോക്‌സോ നിയമപ്രകാരം കേസെടുത്തിട്ടുണ്ട്. സംഭവം പുറത്തറിഞ്ഞതിനെത്തുടര്‍ന്ന് ഇയാള്‍ ഒളിവില്‍ പോയിരിക്കുകയാണ്. പട്ടാമ്പി സ്വദേശിയായ ഇയാള്‍ അഞ്ചു മാസം മുന്‍പാണ് സ്‌കൂളിലെത്തിയത്. ഇയാള്‍ക്കു വേണ്ടിയുള്ള അന്വേഷണം ഊര്‍ജിതമായി നടക്കുന്നുണ്ട്.
മാര്‍ച്ച് എട്ടിന് സംഭവം നടന്നെങ്കിലും പീഡനത്തെക്കുറിച്ച് ചൈല്‍ഡ്‌ലൈന് വിവരം കിട്ടിയതിനെത്തുടര്‍ന്ന് കുട്ടിയെ കൗണ്‍സിലിങ്ങിന് വിധേയമാക്കിയപ്പോഴാണ് വിവരം പുറത്തായത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
