തിരുവനന്തപുരം: നിയമന കേസില്‍ പൊലീസ് മേധാവി ടി.പി.സെന്‍കുമാറിനായി സുപ്രീംകോടതിയില്‍ ഹാജരായ അഭിഭാഷകനെ സര്‍ക്കാരിന്റെ കേസുകള്‍ വാദിക്കുന്നതില്‍ നിന്നും മാറ്റി. അഡ്വക്കേറ്റ് ഹാരിസ് ബീരാനെയാണ് മാറ്റിയിരിക്കുന്നത്.
പത്ത് വര്‍ഷമായി കെഎസ്ആര്‍ടിസിക്കായി സുപ്രീംകോടതിയില്‍ ഹാജരായിരുന്നത് ഹാരീസ് ബീരാനായിരുന്നു. മുഖ്യമന്ത്രിയുടെ നിര്‍ദേശപ്രകാരമാണ് ഹാരീസ് ബീരാനെ സര്‍ക്കാര്‍ കേസുകള്‍ വാദിക്കുന്നതില്‍ നിന്നും മാറ്റിയിരിക്കുന്നതെന്നാണ് സൂചന.
ഹാരിസ് ബീരാന് പകരം വി.ഗിരിയെയാണ് പുതിയ അഭിഭാഷകനായി സര്‍ക്കാര്‍ നിശ്ചയിച്ചിരിക്കുന്നത്. ഇതുമായി ബന്ധപ്പെട്ട ഉത്തരവ് ഗതാഗത മന്ത്രി കെഎസ്ആര്‍ടിസി എംഡിക്ക് കൈമാറി. ഹൈക്കോടതിയിലെ സ്റ്റാന്‍ഡിങ് കോണ്‍സലില്‍ ജോണ്‍ മാത്യുവിനേയും സ്ഥാനത്ത് നിന്നും മാറ്റി. മൂന്നു മാസത്തിനിടയില്‍ നിരവധി കേസുകളില്‍ തിരിച്ചടി നേരിട്ടതിനെ തുടര്‍ന്നാണ് മാറ്റം. നേരത്തെ എന്‍സിപിയുടെ നിര്‍ദേശത്തെ തുടര്‍ന്നായിരുന്നു ജോണ്‍ മാത്യുവിനെ ഈ സ്ഥാനത്ത് നിയമിച്ചത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
