തിരുവനന്തപുരം: സോളാര്‍ കമ്മിഷന്‍ റിപ്പോര്‍ട്ട് സഭയില്‍ വച്ചപ്പോള്‍ താന്‍ ആരുടെയും പേരു പറഞ്ഞിട്ടില്ലെന്ന് മുഖ്യമന്ത്രി പിണറായി വിജയന്‍. പേരു പറഞ്ഞത് പ്രതിപക്ഷ നേതാവ് രമേശ് ചെന്നിത്തലയാണ്. അതെന്തുകൊണ്ടെന്ന് അവര്‍ ആലോചിച്ചാല്‍ മതിയെന്നും പിണറായി വിജയന്‍ നിയമസഭയില്‍ പറഞ്ഞു.
സോളാര്‍ കമ്മിഷന്‍ റിപ്പോര്‍ട്ട് സഭയില്‍ വച്ചപ്പോള്‍ ഉമ്മന്‍ ചാണ്ടി അടക്കമുള്ളവര്‍ക്കെതിരായ ലൈംഗിക ആരോപണം ഒഴിവാക്കിയാണ് മുഖ്യമന്ത്രി സംസാരിച്ചത്. എന്നാല്‍ റിപ്പോര്‍ട്ട് സഭയില്‍ വച്ചതു സംബന്ധിച്ച് ക്രമപ്രശ്‌നം ഉന്നയിച്ചപ്പോള്‍ രമേശ് ചെന്നിത്തല ഉമ്മന്‍ ചാണ്ടിയുടെ പേരു പരാമര്‍ശിച്ചു. ഉമ്മന്‍ ചാണ്ടിയെപ്പോലുള്ള മുതിര്‍ന്ന നേതാക്കള്‍ക്കെതിരെ പോലും സര്‍ക്കാര്‍ ആക്ഷേപങ്ങള്‍ കൊണ്ടുവന്നു എന്നായിരുന്നു ചെന്നിത്തല ചൂണ്ടിക്കാട്ടിയത്. ഇതിനു മറുപടിയായാണ് പിണറായി താന്‍ ആരുടെയും പേരു പരാമര്‍ശിച്ചിട്ടില്ലെന്നു വ്യ്ക്തമാക്കിയത്.
പേരു പരാമര്‍ശിക്കാതിരിക്കാനുള്ള മാന്യത താന്‍ കാണിച്ചു. അതെല്ലാം അന്വേഷണത്തില്‍ തെളിയേണ്ടതാണ്. എന്നാല്‍ പ്രതിപക്ഷ നേതാവ് ഇവിടെ ഒരു പേരു പരാമര്‍ശിച്ചു. താന്‍ അത് ഒഴിവാക്കാന്‍ ശ്രമിച്ചതാണ്. അദ്ദേഹം അത് എന്തുകൊണ്ടു പറഞ്ഞു എന്നത് അവര്‍ ചര്‍ച്ച ചെയ്താല്‍ മതി. കമ്മിഷന്‍ റിപ്പോര്‍ട്ടിലുളള കാര്യങ്ങള്‍ ഒന്നും താന്‍ പുറത്തുപറഞ്ഞിട്ടില്ലെന്ന് റിപ്പോര്‍ട്ട് വായിച്ചാല്‍ വ്യക്തമാവുമെന്ന് പിണറായി പറഞ്ഞു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
