കൊച്ചി: ക്യമ്പസ് രാഷ്ട്രീയം വേണ്ടെന്ന നിലപാടിലുറച്ച് ഹൈക്കോടതി. ക്യാമ്പസിലല്ല രാഷ്ട്രീയ പ്രവര്‍ത്തനം നടത്തേണ്ടത് എന്ന് കോടതി വീണ്ടും ആവര്‍ത്തിച്ചു. ഇത് ആദ്യത്തെ വിധിയല്ലെന്നും കഴിഞ്ഞ പതിനഞ്ച് വര്‍ഷമായി ഇതേകാര്യം കോടതി ആവര്‍ത്തിക്കുന്നുണ്ടെന്നും ഹൈക്കോടതി പറഞ്ഞു.
ഓരോന്നിനും അതിന്റെതായ സ്ഥലങ്ങളുണ്ട്, സമരം ചെയ്യേണ്ടത് കലാലയങ്ങളിലല്ല, കോടതി പറഞ്ഞു. വിദ്യാര്‍ത്ഥി സംഘടനകള്‍ സമാധാനാന്തരീക്ഷം തകര്‍ക്കുന്നുവെന്നും പഠനപ്രവര്‍ത്തനങ്ങള്‍ നടത്താന്‍ സാധിക്കുന്നില്ലെന്നും കാട്ടി പൊന്നാനി എംഇഎസ് കോളജ് കോടതിയില്‍ സമര്‍പ്പിച്ച ഹര്‍ജിയിലാണ് വീണ്ടും കോടതി നിലപാട് വ്യക്തമാക്കിയിരിക്കുന്നത്.
ക്യാമ്പസുകളില്‍ രാഷ്ട്രീയം അനുവദിക്കില്ലെന്ന് കഴിഞ്ഞ 13ന് കോടതി പറഞ്ഞിരുന്നു. സമരം ചെയ്യുന്നുവരെ കോളജില്‍ നിന്നും പുറത്താക്കാമെന്നും സമരം ചെയ്യാനല്ല പഠിക്കാനാണ് വിദ്യാര്‍ത്ഥികള്‍ കോളജില്‍ എത്തുന്നതെന്നും കോടതി പറഞ്ഞിരുന്നു. വിദ്യാര്‍ത്ഥികള്‍ കോളജിലേക്ക് വരുന്നത് പഠിക്കാനാണ്, അവര്‍ക്ക് എന്തെങ്കിലും ആവശ്യങ്ങള്‍ നേടിയെടുക്കാനുണ്ടെങ്കില്‍ അത് സമരത്തിലൂടെയല്ല നേടിയെടുക്കേണ്ടത് എന്നും കോടതി പറഞ്ഞിരുന്നു. ഇതിനെതിരെ ശക്തമായ പ്രതിഷേധങ്ങള്‍ ഉയര്‍ന്നു വന്നിരുന്നു. അതിന് പിന്നാലെയാണ് വീണ്ടും കോടതി നിലപാട് വ്യക്തമാക്കിയിരിക്കുന്നത്. ഹര്‍ജിയില്‍ വാദം കേള്‍ക്കുന്നത് മാറ്റിവെച്ചു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
