ആലുവ മാര്‍ക്കറ്റിലെ കാനയില്‍ അജ്ഞാതന്റെ പഴകിയ മൃതദേഹം

കയ്യിലേയും കാലിലേയുമെല്ലാം തൊലിയടര്‍ന്ന നിലയിലാണ്.
ആലുവ മാര്‍ക്കറ്റിലെ കാനയില്‍ അജ്ഞാതന്റെ പഴകിയ മൃതദേഹം

ആലുവ: തിരക്കേറിയ ആലുവ മാര്‍ക്കറ്റിന് മുന്‍വശത്തെ കാനയില്‍ അജ്ഞാതന്റെ അഴുകിയ നിലയിലുള്ള മൃതദേഹം കണ്ടെത്തി. കയ്യിലേയും കാലിലേയുമെല്ലാം തൊലിയടര്‍ന്ന നിലയിലാണ്. ഏതുസമയത്തും തിരക്കുള്ള സമയത്ത് പഴകിയ ജഡം കണ്ടെത്തിയത് ദുരൂഹതയുണര്‍ത്തുന്നുണ്ട്. ഏകദേശം 50 വയസോളം പ്രായം തോന്നിക്കുന്നതാണ് മൃതദേഹം. കറുത്ത നിറമാണ്. മെറൂണ്‍ നിറമുള്ള ഷര്‍ട്ടും മുണ്ടുമാണ് വേഷം.

മാര്‍ക്കറ്റിന് മുന്‍വശം ദേശീയപാതയുടെ സമാന്തര റോഡിനോട് ചേര്‍ന്നുള്ള കാനയില്‍ മേല്‍പ്പാലത്തിനടിയിലെ വഴിവാണിഭക്കാരിലൊരാളാണ് മൃതദേഹം കണ്ടത്. മേല്‍പ്പാലത്തിനടിയില്‍ കിടന്നുറങ്ങുമ്പോള്‍ കാനയിലേക്ക് വീണതാകാമെന്നും പറയുന്നു. എന്നാല്‍ മുട്ടോളം മാത്രം വെള്ളമുള്ള കാനയില്‍ അഴുകിയ മൃതദേഹം കണ്ടത് ഒട്ടേറെ സംശയത്തിന് കാരണമായിട്ടുണ്ട്. 

രാത്രി കിടന്നുറങ്ങിയപ്പോള്‍ വീണതാണെങ്കില്‍ മൃതദേഹം അഴുകുന്നതിന് മുമ്പേ കാണേണ്ടതാണെന്നാണ് നാട്ടുകാര്‍ പറയുന്നത്. മൃതദേഹം വെള്ളത്തിന് മുകളില്‍ കമിഴ്ന്ന് കിടക്കുന്ന നിലയിലായിരുന്നു. ആലുവ പൊലീസ് എത്തി മൃതദേഹം ജില്ലാ ആശുപത്രിയിലേക്ക് മാറ്റി. ഇതര സംസ്ഥാനക്കാരനായിരിക്കാമെന്നാണ് പൊലീസ് പറയുന്നത്.

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ

Related Stories

No stories found.
logo
Samakalika Malayalam
www.samakalikamalayalam.com