ന്യുഡല്ഹി: ശബരിമലയില് പ്രായഭേദമെന്യേ സ്ത്രീകളെ പ്രവേശിപ്പിക്കുന്നതിനെ എതിര്ത്ത്, കേസില് കോടതിയെ സഹായിക്കാനായി നിയോഗിക്കപ്പെട്ട അഭിഭാഷകന് കെ രാമമൂര്ത്തി. ആചാരങ്ങളെ കോടതി മാനിക്കണമെന്ന് വാദത്തിനിടെ കെ രാമമൂര്ത്തി പറഞ്ഞു.
കേസില് കോടതിയെ സഹായിക്കാനായി രണ്ട് അമിക്കസ് ക്യൂറിമാരെയാണ് നിയോഗിച്ചിരുന്നത്. ഇതില് രാജു രാമചന്ദ്രന് സ്ത്രീ പ്രവേശനത്തെ അനുകൂലിക്കുന്ന നിലപാടാണ് സ്വീകരിച്ചത്. രണ്ടാമത്തെ അമിക്കസ് ക്യൂറി കെ രാമമൂര്ത്തി ഇതിനെ ശക്തമായി എതിര്ത്തു.
മതവിശ്വാസം അനുസരിച്ചാണ് അയ്യപ്പ ക്ഷേത്രത്തിന്റെ പ്രവര്ത്തനമെന്നും വിശ്വാസത്തെ ചോദ്യം ചെയ്യാനാവില്ലെന്നും കെ രാമമൂര്ത്തി പറഞ്ഞു. മതവിശ്വാസം കണക്കിലെടുക്കുമ്പോള് കേരള ഹിന്ദു ആരാധാനാലയ നിയമം ഇവിടെ പരിഗണിക്കാനാവില്ല. സംസ്ഥാന സര്ക്കാര് നിലപാടുകള് മാറ്റുന്നത് രാഷ്ട്രീയ സമ്മര്ദം കൊണ്ടാണെന്ന് കെ രാമമൂര്ത്തി ആരോപിച്ചു.
ഭരണഘടനാ മൂല്യങ്ങള് വച്ച് മതവിശ്വാസം പരിശോധിക്കപ്പെടരുത്. യഹോവാ സാക്ഷികളുടെ ദേശീയ ഗാന കേസില് ഇക്കാര്യം സുപ്രിം കോടതി തന്നെ വ്യക്തമാക്കിയിട്ടുണ്ട്. യഹോവാ സാക്ഷികള് ദേശീയഗാനം ആലപിക്കേണ്ടതില്ലെന്ന് കോടതി വിധിച്ച കാര്യം രാമമൂര്ത്തി ചൂണ്ടിക്കാട്ടി.
മതവിശ്വാസം പോലെയുള്ള കാര്യങ്ങളല്ല ഭരണഘടനാ ബെഞ്ചില് പരിശോധിക്കപ്പെടേണ്ടതെന്നും രാമമൂര്ത്തി അഭിപ്രായപ്പെട്ടു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ