കൊച്ചി : ബൈക്കുകളുടെ ഹാൻഡിൽ പരസ്പരം കൊരുത്തതിനെ തുടർന്ന് റോഡിൽ തെറിച്ചു വീണ നാലു യുവാക്കളിൽ രണ്ടു പേർ മരിച്ചു. കൊച്ചി എളങ്കുന്നപ്പുഴയിലാണ് സംഭവം. കുഴുപ്പിള്ളി ചെറുവൈപ്പ് തച്ചാട്ട് തറയിൽ അജിത് ലാൽ (19), ഞാറയ്ക്കൽ മഞ്ഞനക്കാട് നികത്തിത്തറ ശശിയുടെ മകൻ അഖിൽ ശശി (24 ) എന്നിവരാണ് തൽക്ഷണം മരിച്ചത്.
അപകടത്തെത്തുടർന്ന് ഒരു ബൈക്ക് മാലിപ്പുറം ബന്ദർ കനാലിൽ വീണു. മറ്റേ ബൈക്ക് പാലത്തിന്റെ അരികിലും വീണു. തിങ്കളാഴ്ച പുലർച്ചെ 1.30ന് മാലിപ്പുറം പാലത്തിലായിരുന്നു അപകടം. സുഹൃത്തുക്കളായ നാലുപേരും രണ്ടു ബൈക്കുകളിലായി എറണാകുളം ഭാഗത്തേക്കു പോകുകയായിരുന്നു. പിന്നാലെ എത്തിയ വാഹനമാണ് അപകടവിവരം വൈപ്പിൻ ഫയർ സ്റ്റേഷനിലും ഞാറയ്ക്കൽ പൊലീസിലും അറിയിച്ചത്.
അജിത്ത്ലാൽ ഓടിച്ച ബൈക്കിന്റെ പിന്നിലിരുന്ന അയ്യമ്പിള്ളി പള്ളത്ത് ഹരീഷിന് (29) അപകടത്തിൽ പരിക്കേറ്റിട്ടുണ്ട്. അതേസമയം അഖിൽ ശശിയോടൊപ്പം ഉണ്ടായിരുന്ന കടമക്കുടി പുതുശേരപറമ്പത്ത് നിഷാദ് പരുക്കില്ലാതെ രക്ഷപ്പെട്ടു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ