കോട്ടയം: സംസ്ഥാന സർക്കാരിന്റെ പൂജ ബംബർ ലോട്ടറിയുടെ നാലു കോടി രൂപ സമ്മാനം തമിഴ്നാട്ടുകാരന്. തിരുനൽവേലി സ്വദേശിയായ ഷണ്മുഖൻ മാരിയപ്പനെയാണ് ഭാഗ്യദേവത തുണച്ചത്. കോട്ടയം നഗരത്തിലെ പ്രമുഖ തുണിക്കടയിൽ മെൻസ് വെയർ വിഭാഗത്തിലെ സൂപ്പർവൈസറാണ് ഷണ്മുഖൻ.
കഴിഞ്ഞയാഴ്ച ഏറ്റുമാനൂർ ക്ഷേത്രത്തിൽ ദർശനം കഴിഞ്ഞ് മടങ്ങിവരുമ്പോൾ അമ്പലത്തിന് മുന്നിൽ നിന്ന ലോട്ടറി വിൽപ്പനക്കാരനിൽ നിന്നും വാങ്ങിയ ടിക്കറ്റിനാണ് ഒന്നാം സമ്മാനം. VA 489017 എന്ന നമ്പറിനാണ് ഷൺമുഖന് സമ്മാനം ലഭിച്ചത്. വെള്ളിയാഴ്ച വൈകുന്നേരം മൂന്നിനാണ് നറുക്കെടുപ്പ് നടന്നത്. വൈകുന്നേരം തന്നെ താനാണ് കോടിപതിയെന്ന് ഷൺമുഖൻ അറിയുകയും ചെയ്തു. സമ്മാനാർഹമായ ടിക്കറ്റ് ബാങ്കിൽ ഏൽപ്പിച്ചു.
ഏറെ പ്രാരാബ്ദങ്ങളുള്ള 51 വയസുകാരനായ ഷണ്മുഖൻ അവിവാഹിതനാണ്. മൂന്നു സഹോദരങ്ങളും ഒരു സഹോദരിയുമുണ്ട്. സ്വന്തമായി സ്ഥലമോ വീടോ ഇല്ലാത്ത ഷണ്മുഖന്റെ കുടുംബം തമിഴ്നാട്ടിലെ തിരുനൽവേലിയിൽ വാടകവീട്ടിലാണ് കഴിയുന്നത്. ഒരു വീട് വയ്ക്കണം, അൽപം സ്ഥലം വാങ്ങണം അത്രയേയുള്ളു ഷൺമുഖന്റെ ആഗ്രഹം. ഏറ്റുമാനൂരപ്പനാണ് തനിക്ക് ഈ ഭാഗ്യം കൊണ്ടുവന്നതെന്ന് വിശ്വസിക്കാനാണ് ഷൺമുഖന് ഇഷ്ടം.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ