തിരുവനന്തപുരം; ശബരിമല വിഷയത്തില് നിരാഹാരം കിടക്കുന്ന ബിജെപി സംസ്ഥാന ജനറല് സെക്രട്ടറി എ എന് രാധാകൃഷ്ണന്റെ ആരോഗ്യനില മോശമായതിനെ തുടര്ന്ന് ഇന്ന് ആശുപത്രിയിലേക്ക് മാറ്റിയേക്കും. സെക്രട്ടേറിയേറ്റിന് മുന്നില് നടക്കുന്ന നിരാഹാര സമരം എട്ടാം ദിവസത്തിലേക്ക് കടന്നിരിക്കുയാണ്. രാധാകൃഷ്ണന്റെ ആരോഗ്യനില മോശമാണെന്നും നിരാഹാരം അവസാനിപ്പിക്കണമെന്നും ഇന്നലെ ഡോക്റ്റര്മാര് ആവശ്യപ്പെട്ടിരുന്നു.
രക്തസമ്മര്ദ്ദവും രക്തത്തിലെ പഞ്ചസാരയുടെ അളവും കുറഞ്ഞിരിക്കുകയാണ്. ഇതിനാല് ആശുപത്രിയിലേക്ക് മാറ്റണമെന്നാണ് ഡോക്റ്റര്മാര് നിര്ദേശം നല്കിയിരിക്കുന്നത്. എ എന് രാധാകൃഷ്ണന് സമരം അവസാനിപ്പിക്കേണ്ടി വന്നാല് പകരം മുതിര്ന്ന നേതാവ് സി കെ പത്മനാഭന് നിരാഹാരമിരിക്കും. കൂടാതെ പ്രശ്നത്തില് സര്ക്കാര് ഉടന് ഇടപെടണമെന്ന് ആവശ്യപ്പെട്ട് ബിജെപി പ്രതിഷേധ ദിനം ആചരിക്കും. സെക്രട്ടേറിയറ്റിന് മുന്നിലേക്കും കളക്റ്ററേറ്റുകളിലേക്കും മാര്ച്ച് നടത്താനാണ് തീരുമാനം.
രാധാകൃഷ്ണന്റെ ജീവന് രക്ഷിക്കാന് സര്ക്കാര് മുന്നോട്ടു വരണമെന്ന് ബിജെപി സംസ്ഥാന അധ്യക്ഷന് പി.എസ് ശ്രീധരന്പിള്ള ആവശ്യപ്പെട്ടു. കെ സുരേന്ദ്രനെതിരായ കേസുകള് പിന്വലിക്കുക, ശബരിമലയിലെ അടിസ്ഥാന സൗകര്യങ്ങള് വര്ദ്ധിപ്പിക്കുക തുടങ്ങിയ ആവശ്യങ്ങള് ഉന്നയിച്ചാണ് എഎന് രാധാകൃഷ്ണന് സമരം തുടങ്ങിയത്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ