കൊച്ചി: വനിതാ മതില് സംഘടിപ്പിക്കുന്നത് സര്ക്കാര് ചെലവിലാണെന്ന് സര്ക്കാര് ഹൈക്കോടതിയില്. സ്ത്രീകള്ക്ക് എതിരായ അതിക്രമം തടയാന് മാറ്റിവച്ച അമ്പതുകോടിയില് നിന്നാണ് പണം ചെലവഴിക്കുന്നത്. ബഡ്ജറ്റില് നീക്കിവച്ച ഈ തുക ചെലവഴിച്ചില്ലെങ്കില് നഷ്ടമാകുമെന്നും സര്ക്കാര് കോടതിയില് വ്യക്തമാക്കി.
അതേസമയം, സര്ക്കാര് ഫണ്ടില് നിന്ന് പണം ചെലവാക്കുന്നത് അനുവദിക്കരുത് എന്ന വാദം കോടതി അംഗീകരിച്ചില്ല. ചെലവാക്കുന്ന തുകയുടെ കണക്ക് പരിപാടി നടത്തിയതിന് ശേഷം സമര്പ്പിക്കണമെന്ന് കോടതി നിര്ദേശിച്ചു.
വനിതാ മതില് രാഷ്ട്രീയ പരിപാടിയല്ലെന്ന് സര്ക്കാര് കോടതിയില് പറഞ്ഞു. അന്താരാഷ്ട്ര ചലച്ചിത്രോത്സവം, യുവജനോത്സവം, ബിനാലെ തുടങ്ങിയവ പോലെയുള്ള ഒരു പരിപാടി മാത്രമാണിതെന്നും സത്യവാങ്മൂലത്തില് പറയുന്നു.
സര്ക്കാര് ജീവനക്കാരെ പരിപാടിയില് നിര്ബന്ധിച്ച് പങ്കെടുപ്പിക്കില്ലെന്നും പങ്കെടുക്കാത്തവര്ക്കെതിരെ ശിക്ഷാനടപടിയുണ്ടാകില്ലെന്നും സര്ക്കാര് കോടതിയെ അറിയിച്ചു.
18 വയസ്സില് താഴെയുള്ളവരെ വനിതാ മതിലില് പങ്കെടുപ്പിക്കരുതെന്ന് ഹൈക്കോടതി സര്ക്കാരിനോട് ആവശ്യപ്പെട്ടിട്ടുണ്ട്. കാസര്കോട് നിന്നും തിരുവനന്തപുരം വരെ സ്ത്രീകള് അണിനിരക്കുന്ന വനിതാ മതിലിന്റെ സാമ്പത്തിക സ്രോതസ്സ് എന്താണെന്ന് വ്യക്തമാക്കാന് കോടതി നേരത്തേ ആവശ്യപ്പെട്ടിരുന്നു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ