തൃശൂര്‍: വിയ്യൂര്‍ ജയിലില്‍ ടിപി വധക്കേസ് പ്രതിക്കു കഞ്ചാവ് കച്ചവടം. 50,000 രൂപ വരെയാണ് വില്‍പനയിലുടെ ലഭിക്കുന്ന മാസ വരുമാനം. ടി പി ചന്ദ്രശേഖരന്‍ കേസിലെ പ്രതി എം സി അനൂപാണ് ജയിലില്‍ പത്തിരട്ടി വിലയ്ക്ക് ലഹരി വിറ്റ് 'ബിസിനസു'കാരനായി വിലസുന്നത് .
രാഷ്ട്രീയ സ്വാധീനം ചെലുത്തി ജയിലിലെ മേസ്തിരി പട്ടം നേടിയെടുത്ത അനൂപ്, പുറം പണിക്ക് പോകുന്ന തടവുകാരെ ഭീഷണിപ്പെടുത്തി ബീഡിയും കഞ്ചാവും മദ്യവും എത്തിക്കും.ഇതു വിപണിയിലുള്ളതിന്റെ പത്തിരട്ടി വരെ വിലയ്ക്കു വില്‍ക്കും. സഹായിക്കാത്ത സഹതടവുകാരെ മര്‍ദിക്കുന്നതാണു ശൈലി.
ഈ ഞെട്ടിപ്പിക്കുന്ന വിവരങ്ങള്‍ ജയിലിലെ പരാതിപ്പെട്ടിയില്‍ പേരു വയ്ക്കാതെ ലഭിച്ച കുറിപ്പിലാണ് ഉള്ളത്. റഹിം എന്ന തടവുകാരനെ രണ്ടാഴ്ച മുന്‍പ് ക്രൂരമായി മര്‍ദിച്ചു. പുറത്തുനിന്ന് ജയില്‍ മതിലിനുള്ളിലേക്ക് എറിഞ്ഞ കഞ്ചാവും ബീഡിയും എടുത്തു കൊടുക്കാത്തതായിരുന്നു കാരണമെന്നു പരാതിയില്‍ പറയുന്നു. റഹിം മെഡിക്കല്‍ കോളജില്‍ ചികിത്സയിലാണ്. ഷാജി എന്ന തടവുകാരനെയും മര്‍ദിച്ചതായി പരാതിയിലുണ്ട്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
