മുവാറ്റുപുഴ: റോഡരികില്‍ നിര്‍ത്തിയിട്ടിരുന്ന കെഎസ്ആര്‍ടിസി ലോ ഫ്‌ളോര്‍ ബസ് അടിച്ചുമാറ്റാനുള്ള ശ്രമം പരാജയപ്പെട്ടപ്പോള്‍ കള്ളന്‍ ബസിന്റെ താക്കോലുമായി കടന്നു. മുവാറ്റുപുഴ ഫോര്‍ട്ട് കൊച്ചി റൂട്ടില്‍ സര്‍വീസ് നടത്തുന്ന ബസിന്റെ താക്കോല്‍ അടിച്ചുമാറ്റിയാണ് മോഷ്ടാവ് കലിപ്പു തീര്‍ത്തത്.
ഡിപ്പോയില്‍ പണി നടക്കുന്നതിനാല്‍ ഭൂരിഭാഗം ബസുകളും റോഡരികിലാണ് പാര്‍ക്ക് ചെയ്യുന്നത്. ഡിപ്പോയില്‍ ചെയ്യുന്നതു പോലെ ബസ് നിര്‍ത്തിയിട്ടു പോവുന്ന ഡ്രൈവര്‍മാര്‍ താക്കോല്‍ ഊരിയെടുത്തു സൂക്ഷിക്കാറില്ല. ഇതു മുതലെടുത്താണ് മോഷ്ടാവ് ബസ് അടിച്ചുമാറ്റാന്‍ ശ്രമം നടത്തിയത്.
ബസ് കൊണ്ടുപോവാനുള്ള ശ്രമം നടക്കാത്തതുകൊണ്ടാവണം മോഷ്ടാവ് താക്കോലുമായി കടന്നതെന്നാണ് ജീവനക്കാര്‍ പറയുന്നത്. തിങ്കളാഴ്ച പുലര്‍ച്ചെ സര്‍വീസ് ആരംഭിക്കാനായി ഡ്രൈവര്‍ എത്തിയപ്പോഴാണ് താക്കോല്‍ നഷ്ടപ്പെട്ട വിവരം അറിയുന്നത്. തുടര്‍ന്ന് സര്‍വീസ് റദ്ദു ചെയ്തു.
സര്‍വീസ് റദ്ദാക്കിയതോടെ ദുരിതത്തിലായ യാത്രക്കാര്‍ പ്രതിഷേധിച്ചു. എങ്കിലും വൈകിട്ടോടെ മറ്റൊരു താക്കോല്‍ എത്തിച്ചാണ് സര്‍വീസ് പുനരാരംഭിക്കാനായത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
