അഭിമന്യു വധക്കേസില്‍ യുഎപിഎ ചുമത്തല്‍ : ഡിജിപി നിയമോപദേശം തേടി

ഡിജിപി ലോക്‌നാഥ് ബെഹ്‌റ അഡ്വക്കേറ്റ് ജനറല്‍, പ്രോസിക്യൂഷന്‍ ഡയറക്ടര്‍ ജനറല്‍ എന്നിവരുമായി കൂടിക്കാഴ്ച നടത്തി 
അഭിമന്യു വധക്കേസില്‍ യുഎപിഎ ചുമത്തല്‍ : ഡിജിപി നിയമോപദേശം തേടി

കൊച്ചി : എസ്എഫ്‌ഐ പ്രവര്‍ത്തകന്‍ അഭിമന്യുവിനെ കൊലപ്പെടുത്തിയ കേസില്‍ പ്രതികള്‍ക്കെതിരെ യുഎപിഎ ചുമത്തുന്നത് സംബന്ധിച്ച് ഡിജിപി ലോക്‌നാഥ് ബെഹ്‌റ നിയമോപദേശം തേടി. ഇതിനായി ഡിജിപി അഡ്വക്കേറ്റ് ജനറലിനെയും, ഡയറക്ടര്‍ ജനറല്‍ ഓഫ് പ്രോസിക്യൂഷന്‍സിനെയും സന്ദര്‍ശിച്ചു. സൗഹൃദസന്ദര്‍ശനമെന്നാണ് പ്രോസിക്യൂഷന്‍ ഡയറക്ടര്‍ ജനറല്‍ പിന്നീട് പ്രതികരിച്ചത്.

അഭിമന്യുവിനെ കൊലപ്പെടുത്തിയതില്‍ ഗൂഢാലോചന നടന്നിട്ടുണ്ടെന്ന് ഡിജിപി ലോക്‌നാഥ് ബെഹ്‌റ രാവിലെ വ്യക്തമാക്കിയിരുന്നു. പ്രതികള്‍ക്ക് പുറമെനിന്ന് പിന്തുണ ലഭിച്ചിട്ടുണ്ട്. കേസില്‍ യുഎപിഎ ചുമത്തുന്നത് പരിഗണനയിലാണ്. ഇക്കാര്യത്തില്‍ നിയമോപദേശം തേടുമെന്നും ബെഹ്‌റ വ്യക്തമാക്കിയിരുന്നു. പിന്നീട് ഡിജിപി കേസിന്റെ അന്വേഷണ പുരോഗതി വിലയിരുത്തിയിരുന്നു. 

അതിനിടെ കേസില്‍ ഇന്ന് നാല് പേരെ കൂടി പൊലീസ് കസ്റ്റഡിയിലെടുത്തു. പിടിയിലായവരില്‍ അഭിമന്യുവിന്റെ കൊലപാതകത്തില്‍ നേരിട്ട് പങ്കുള്ളവരും ഉള്ളതായാണ് സൂചന. അഭിമന്യുവിനെ കുത്തിയത് മുഹമ്മദാണ് എന്നാണ് പൊലീസിന്റെ നിഗമനം. കൊലയാളി സംഘത്തില്‍ രണ്ട് മുഹമ്മദുമാര്‍ ഉള്ളതായും പൊലീസ് വ്യക്തമാക്കിയിരുന്നു.  കേസില്‍ നേരത്തെ പിടിയിലായവരെ പൊലീസ് ചോദ്യം ചെയ്യലിനായി കസ്റ്റഡിയില്‍ വാങ്ങി. 
 

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ

Related Stories

No stories found.
logo
Samakalika Malayalam
www.samakalikamalayalam.com