കാടാച്ചിറ: കണ്ണൂര് കാടാച്ചിറ സബ് രജിസ്ട്രാര് ഓഫീസില് ഇരുന്ന മരബെഞ്ച് തകര്ന്ന് ഗുരുതരാവസ്ഥയില് ചികിത്സയിലായിരുന്ന ആള് മരിച്ചു. കാപ്പാട് സി.പി. സ്റ്റോറിന് സമീപത്തെ മണലില് ഹൗസില് വത്സരാജനാ(55)ണ് മരിച്ചത്. കുടുംബസ്വത്തിന്റെ ആധാരം രജിസ്റ്റര് ചെയ്യാന് എത്തിയപ്പോഴാണ് ദാരുണ സംഭവം.നട്ടെല്ല് തകര്ന്ന വത്സരാജന് മംഗളൂരു കെ.എം.സി. ആസ്പത്രിയിലാണ് ചികിത്സ തേടിയത്.
രജിസ്ട്രേഷനാവശ്യമായ രേഖകള് നല്കിയശേഷം, രജിസ്ട്രാര് ഓഫീസിലെത്തുന്നവര്ക്കുള്ള ഇരിപ്പിടത്തില് ഇരുന്നതാണ് വത്സരാജന്. കുടുംബാംഗങ്ങളും ഒപ്പമുണ്ടായിരുന്നു. കാലപ്പഴക്കമുള്ള ഒരു മരബെഞ്ചാണ് ഇവിടെയുണ്ടായിരുന്നത്. ഇരുന്നയുടനെ ബെഞ്ച് തകര്ന്ന് ഇദ്ദേഹം മുറ്റത്തേക്കു വീണു. ഉടനെ കണ്ണൂരിലെ ആസ്പത്രിയിലെത്തിച്ചെങ്കിലും നട്ടെല്ലിന് ക്ഷതമുണ്ടെന്നും അടിയന്തരമായി വിദഗ്ധചികിത്സ നല്കണമെന്നും ഡോക്ടര്മാര് നിര്ദേശിച്ചു. നാഡികളും തകര്ന്നിട്ടുണ്ടായിരുന്നു. ഇതോടെയാണ് മംഗളൂരുവിലേക്കു കൊണ്ടുപോയത്. തയ്യല്ത്തൊഴിലാളിയാണ് ഇദ്ദേഹം. ഭാര്യയും രണ്ടു മക്കളുമടങ്ങുന്നതാണ് ഇദ്ദേഹത്തിന്റെ കുടുംബം.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ