തിരുവനന്തപുരം: കോഴിക്കോട് ജില്ലയില് മാത്രമാണ് നിപ്പാ വൈറസ് ബാധിച്ചതെങ്കിലും സംസ്ഥാനമൊട്ടാകെ ജഗ്രത പുലര്ത്താന് ആരോഗ്യവകുപ്പിന് നിര്ദേശം നല്കിയതായി മുഖ്യമന്ത്രി പിണറായി വിജയന്. നിപ്പാ വൈറസ് മൂലം കോഴിക്കോട് ജില്ലയിലെ പേരാമ്പ്രയില് ഏതാനും പേര് മരണപ്പെട്ട പ്രശ്നം സര്ക്കാര് അതിവ ഗൗരവത്തോടെയാണ് കൈകാര്യം ചെയ്യുന്നത്. രോഗം പടരാതിരിക്കാനും രോഗം ബാധിച്ചവരെ രക്ഷപ്പെടുത്താനും ആരോഗ്യവകുപ്പ് സാധ്യമായ എല്ലാ നടപടികളും സ്വീകരിക്കുന്നുണ്ട്. ആരോഗ്യമന്ത്രിയും തൊഴില് മന്ത്രിയും കോഴിക്കോട്ട് ക്യാമ്പ് ചെയ്ത് വൈറസ്ബാധ നേരിടുന്നതിനുളള നടപടികള്ക്ക് നേതൃത്വം നല്കുന്നുണ്ടെന്ന് അദ്ദേഹം തന്റെ യെ്സ്ബുക്ക് പോസ്റ്റിലൂടെ വ്യക്തമാക്കി.
മരണപ്പെട്ട നാലുപേരുടെ സ്രവം നേരത്തെ നാഷണല് വൈറോളജി ഇന്സ്റ്റിറ്റിയൂട്ടിലേക്ക് പരിശോധനയ്ക്കയച്ചതില് മൂന്നു പേരുടെ മരണം വൈറസ് മൂലമാണെന്ന് സ്ഥിരീകരിച്ചിട്ടുണ്ട്. സംശയമുളള മറ്റുളളവരുടെയും സാമ്പിള് ശേഖരിച്ച് അയച്ചിട്ടുണ്ട്. അതിന്റെ റിപ്പോര്ട്ട് ലഭിച്ചിട്ടില്ല. 19ന് ശനിയാഴ്ചയാണ് സംശയകരമായ മരണം ശ്രദ്ധയില്പ്പെട്ടത്. അസാധാരണ മരണമായതുകൊണ്ട് അന്നുതന്നെ കേന്ദ്രആരോഗ്യമന്ത്രായലയവുമായും ലോകാരോഗ്യസംഘടനയുമായും ബന്ധപ്പെട്ടിരുന്നു.
സംസ്ഥാന സര്ക്കാരിന്റെ അഭ്യര്ത്ഥന പ്രകാരം കേന്ദ്രസര്ക്കാരിന്റെവിദഗ്ധ മെഡിക്കല് സംഘം കോഴിക്കോട്ടെത്തിയിട്ടുണ്ട്. കേന്ദ്രസംഘവുമായി യോജിച്ചും അവരുടെ മാര്ഗ്ഗനിര്ദേശമനുസരിച്ചും നിപ്പാ വൈറസ് അമര്ച്ച ചെയ്യുന്നതിന് സര്ക്കാര് സാധ്യമായതെല്ലാം ചെയ്യും. പനിബാധിച്ച് എത്തുന്ന ആര്ക്കും ചികിത്സ നിഷേധിക്കരുതെന്ന് സ്വകാര്യ ആശുപത്രികള്ക്ക് നിര്ദേശം നല്കിയിട്ടുണ്ട്-അദ്ദേഹം പറഞ്ഞു.
കോഴിക്കോട് മാത്രമാണ് വൈറസ്ബാധ സ്ഥിരീകരിച്ചതെങ്കിലും സംസ്ഥാനമാകെ ജാഗ്ര പുലര്ത്താന് ആരോഗ്യവകുപ്പിനോട് നിര്ദേശിച്ചിട്ടുണ്ട്. കോഴിക്കോട് ജില്ലയില് ആവശ്യമായ സ്ഥലങ്ങളില് ഐസൊലേഷന് വാര്ഡുകള് ഏര്പ്പെടുത്തി. 24 മണിക്കൂറും പ്രവര്ത്തിക്കുന്ന കണ്ട്രോള് റൂമും അവിടെ തുറന്നിട്ടുണ്ട്. ആരോഗ്യമന്ത്രിയുടെ നേതൃത്വത്തില് സ്ഥിതിഗതികള് അപ്പപ്പോള് അവലോകനം ചെയ്ത് നടപടി സ്വീകരിച്ചു വരുന്നു.
നിപ വൈറസ് ബാധ സ്ഥിരീകരിച്ചിട്ടുണ്ടെങ്കിലും ജനങ്ങള് പരിഭ്രാന്തരാകേണ്ട സാഹചര്യമില്ല. ആരോഗ്യവകുപ്പ് നിര്ദേശിക്കുന്ന മുന്കരുതലുകള് എടുത്ത് ഇപ്പോഴത്തെ പ്രതിസന്ധി പരിഹരിക്കാന് എല്ലാവരും ഒന്നിച്ചുനില്ക്കണമെന്ന് അഭ്യര്ത്ഥിക്കുന്നു-അദ്ദേഹം പറഞ്ഞു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ