കെവിന്റെ കൊലപാതകം: പൊലീസുദ്യോഗസ്ഥരുടെ മനസിനെയും ഭരിച്ചത് ജാതിവിവേചനമായിരിക്കാമെന്ന് തോമസ് ഐസക്
By സമകാലികമലയാളം ഡെസ്‌ക് | Published: 28th May 2018 08:48 PM |
Last Updated: 28th May 2018 08:48 PM | A+A A- |
കോട്ടയം: കെവിന്‍ പി ജോസഫ് എന്ന ചെറുപ്പക്കാരന്റെ ക്രൂരമായ കൊലപാതകം കേരളത്തിന്റെ നവോത്ഥാന പാരമ്പര്യത്തിനേറ്റ തീരാക്കളങ്കമാണെന്ന് മന്ത്രി തോമസ ഐസക്. ജാതിക്കോയ്മയുടെ മിഥ്യാഭിമാനബോധം വിചിത്രവും അപകടകരവുമായ വഴികളിലൂടെ വീണ്ടും തലപൊക്കുകയാണെന്നും ഐസ്‌ക് ഫെയ്‌സ്ബുക്കില്‍ കുറിച്ചു
നീനുവിന്റെ മാതാപിതാക്കള്‍ മിശ്രവിവാഹിതരാണ്. പക്ഷേ, അവര്‍ക്ക് സ്വന്തം മകളുടെ ജാതിയ്ക്കതീതമായ പ്രണയം അംഗീകരിക്കാന്‍ കഴിഞ്ഞില്ല. അതിനു കാരണം സവര്‍ണതയുടെ പിശാചുബാധയാണെന്ന് കാണാന്‍ വിഷമമില്ല. ഒരുവേള, നീനുവിന്റെ പരാതിയെ നിസാരമായി അവഗണിച്ച പൊലീസുദ്യോഗസ്ഥരുടെ മനസിനെയും ഭരിച്ചത് ജാതിവിവേചനമായിരിക്കാം.
നവോത്ഥാനം അടിമുടി ഉഴുതുമറിച്ച മണ്ണില്‍ നിന്നാണ് നമ്മുടെ രാഷ്ട്രീയവും സംസ്‌ക്കാരവും ഉയര്‍ന്നു വന്നത്. എന്നാല്‍ കുഴിച്ചു മൂടിയെന്ന് നാം അഹങ്കരിച്ച പലതും മുളച്ചു വരികയാണെന്ന യാഥാര്‍ത്ഥ്യത്തിനു നേരെ കണ്ണടച്ചു കൂടാ. താല്‍ക്കാലിക രാഷ്ട്രീയ ലാഭത്തിനും തെരഞ്ഞെടുപ്പു നേട്ടത്തിനും വേണ്ടി മുതലെടുപ്പു നടത്തുന്നവരെയും ഇക്കാര്യങ്ങള്‍ അലോസരപ്പെടുത്തേണ്ടതു തന്നെയാണെന്ന് തോമസ് ഐസക് ഫെയ്‌സ്ബുക്കില്‍ കുറിച്ചു.
