ലുബാന് ചുഴലിക്കാറ്റ് മണിക്കൂറില് 125 കിലോമീറ്റര് വരെ വേഗതയില് ; വെളളിയാഴ്ച വരെ ഉള്ക്കടലില് പോകരുതെന്ന് മുന്നറിയിപ്പ്
തിരുവനന്തപുരം: ലക്ഷദ്വീപിന് സമീപം ന്യൂനമര്ദം ശക്തിപ്പെട്ട് രൂപം കൊണ്ട ലുബാന് ചുഴലിക്കാറ്റ് ഒമാന്റെ തെക്കന് തീരത്തേയ്ക്ക് നീങ്ങുമെന്ന് കാലാവസ്ഥ വകുപ്പ്. ഇതിന്റെ പ്രതിഫലനമെന്നോണം മണിക്കൂറില് 125 കിലോമീറ്റര് വരെ വേഗതയില് കാറ്റ് വീശും. അതിനാല് വെളളിയാഴ്ച വരെ ഉള്ക്കടലില് മീന്പിടിക്കാന് പോകരുതെന്ന് കാലാവസ്ഥ നിരീക്ഷണ കേന്ദ്രം മുന്നറിയിപ്പ് നല്കി.
അറബിക്കടലില് രൂപപ്പെട്ട ന്യൂനമര്ദ്ദം ശക്തമായ സാഹചര്യത്തില് സംസ്ഥാനത്ത് ഇന്നും നാളെയും ശക്തമായ മഴയുണ്ടാകുമെന്ന് കാലാവസ്ഥാ നിരീക്ഷണകേന്ദ്രം മുന്നറിയിപ്പ് നല്കി. ന്യൂനമര്ദ്ദം ശക്തിപ്പെട്ട് ഒമാന് തീരത്തേക്ക് നീങ്ങുമെങ്കിലും ഇതിന്റെ സ്വാധീനം മൂലം ഇടുക്കി, പത്തനംതിട്ട, മലപ്പുറം, പാലക്കാട്, വയനാട് ജില്ലകളില് ശക്തമായ മഴ പെയ്യുമെന്നാണ് പ്രവചനം. ഈ ജില്ലകളില് ഓറഞ്ച് അലര്ട്ടും മറ്റ് ജില്ലകളില് യെല്ലോ അലര്ട്ടും പ്രഖ്യാപിച്ചിട്ടുണ്ട്.
ന്യൂനമര്ദ്ദം കൂടുതല് കരുത്ത് നേടി തീവ്രന്യൂനമര്ദ്ദമായി മാറിയതായി ഇന്നലെ കാലാവസ്ഥാ നിരീക്ഷണ കേന്ദ്രം അറിയിച്ചിരുന്നു. ലക്ഷദ്വീപിലെ മിനിക്കോയ് ദ്വീപിന് 960 കി.മീ വടക്ക് പടിഞ്ഞാറും, ഒമാനിലെ സലാലയ്ക്ക് 1336 കിമീ കിഴക്കുമായാണ് ന്യൂനമര്ദ്ദം ഉള്ളത്. തിങ്കളാഴ്ച്ച രാവിലെ ഇത് അതിതീവ്രന്യൂനമര്ദ്ദമായും ചുഴലിക്കാറ്റായും മാറും എന്നാണ് കാലാവസ്ഥാ വിദഗ്ദ്ധരുടെ പ്രവചനം.
മുന്നറിയിപ്പിന്റെ പശ്ചാത്തലത്തില് അഡീഷണല് ചീഫ് സെക്രട്ടറി പി.എച്ച് കുര്യന്റെ നേതൃത്വത്തില് സെക്രട്ടേറിയറ്റില് 24 മണിക്കൂറും പ്രവര്ത്തിക്കുന്ന സെല് പ്രവര്ത്തനം തുടങ്ങി. മുന്കരുതല് നടപടിയുടെ ഭാഗമായി കെഎസ്ഇബി 13 ഡാമുകളുടെ ഷട്ടറുകള് തുറന്നു. ഇന്നത്തെ കാലാവസ്ഥ റിപ്പോര്ട്ടുകള് പരിഗണിച്ചായിരിക്കും ഷട്ടര് അടയ്ക്കുന്ന കാര്യത്തില് തീരുമാനമെടുക്കുകയെന്ന് കെഎസ്ഇബി അറിയിച്ചു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ