ശബരിമല യുവതീപ്രവേശന വിഷയത്തില് പന്തളം രാജകുടുംബത്തിനും സംഘപരിവാറിനും അനുകൂലമായി നിലപാട് സ്വീകരിക്കുന്ന കോണ്ഗ്രസ് നേതാക്കള്ക്കെതിരെ വി.ടി ബല്റാം എംഎല്എ. രാഹുല് ഗാന്ധിയാണ്, രാഹുല് ഈശ്വറല്ല കോണ്ഗ്രസിന്റെ നേതാവ് എന്ന് അദ്ദേഹം ഫെയ്സ്ബുക്കില്
കുറിച്ചു. ചാനല് ചര്ച്ചകളിലും മറ്റും സംഘപരിവാറിനും രാജകുടുംബത്തിനും അനുകൂലമായി നിലപാട് സ്വീകരിക്കുന്ന കോണ്ഗ്രസ് നേതാക്കളെയും അദ്ദേഹം വിമര്ശിക്കുന്നു.
ശബരിമല വിഷയത്തില് സുപ്രീം കോടതി വിധിയെ സ്വാഗതം ചെയ്യുന്ന എന്റെ വ്യക്തിപരമായ കാഴ്ചപ്പാട് അതേപടി നിലനിര്ത്തുന്നതോടൊപ്പം സമൂഹത്തിലെ വലിയൊരു വിഭാഗം വരുന്ന അയ്യപ്പഭക്തരുടെ വികാരങ്ങളെക്കൂടി ഉള്ക്കൊണ്ട് നിലപാടെടുക്കാനുള്ള കോണ്ഗ്രസിന്റെ ജനാധിപത്യ ഉത്തരവാദിത്തത്തെയും മനസ്സിലാക്കുന്നു. പ്രകോപനങ്ങളും പിടിവാശികളും കൊണ്ട് മതേതര കേരളത്തെ വര്ഗീയമായി നെടുകെപ്പിളര്ക്കാനുള്ള ഒരവസരമാക്കി ഈ വിഷയത്തെ മാറ്റിയ സംഘ് പരിവാറിനേയും സര്ക്കാരിനേയും തുറന്നു കാട്ടേണ്ടതുമുണ്ട്. എന്നാല് അതിനപ്പുറം ബ്രാഹ്മണ്യത്തിന്റെയും രാജഭക്തിയുടേയും പുരോഗമനവിരുദ്ധ ആശയങ്ങളുടേയും വക്താക്കളാകേണ്ട ഒരു ചുമതലയും കോണ്ഗ്രസിനില്ല-അദ്ദേഹം പറഞ്ഞു.
പഴയ നാട്ടുരാജാക്കന്മാരുടെ സകല കവനന്റുകളും ചവറ്റുകുട്ടയിലെറിഞ്ഞ് പ്രിവി പേഴ്സ് നിര്ത്തലാക്കിയ ഇന്ദിരാഗാന്ധിയുടെ പാര്ട്ടിയാണ് ഇന്ത്യന് നാഷണല് കോണ്ഗ്രസ്. പാര്ട്ടിയെ പ്രതിനിധീകരിച്ച് ചാനല് ചര്ച്ചകളില് പങ്കെടുക്കുന്ന ചിലര്ക്ക് പാര്ട്ടിയുടെ ആശയപരമായ ലെഗസിയേക്കുറിച്ച് പ്രാഥമിക ധാരണകളെങ്കിലും ഉണ്ടെന്ന് ഉറപ്പുവരുത്തേണ്ടത് അനിവാര്യമാണ്. ഇക്കാര്യം കെപിസിസി പ്രസിഡന്റിനെ നേരിട്ട് തന്നെ അറിയിച്ചിട്ടുണ്ട്. ഓര്ക്കുക; രാഹുല് ഗാന്ധിയാണ്, രാഹുല് ഈശ്വറല്ല കോണ്ഗ്രസിന്റെ നേതാവ്-അദ്ദേഹം പറഞ്ഞു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ