ലൈംഗിക പീഡനം : സരിത ഇന്ന് മൊഴി നല്‍കിയേക്കും

ലൈംഗിക പീഡന കേസില്‍ മുന്‍ മുഖ്യമന്ത്രി ഉമ്മന്‍ചാണ്ടി, കെ സി വേണുഗോപാല്‍ എംപി  എന്നിവര്‍ക്കെതിരെ ക്രൈംബ്രാഞ്ച്  കേസ് രജിസ്റ്റര്‍ ചെയ്തിരുന്നു
ലൈംഗിക പീഡനം : സരിത ഇന്ന് മൊഴി നല്‍കിയേക്കും

തിരുവനന്തപുരം : സോളാര്‍ കേസില്‍ പരാതിക്കാരി സരിതാ എസ് നായര്‍ ഇന്ന് ക്രൈംബ്രാഞ്ചിന് മൊഴി നല്‍കിയേക്കും. മൊഴി നല്‍കാന്‍ ഹാജരാകണം എന്നാവശ്യപ്പെട്ട് അന്വേഷണ ഉദ്യോഗസ്ഥന്‍ ഡിവൈഎസ്പി ഷാനവാസ് സരിതയ്ക്ക് നോട്ടീസ് നല്‍കിയിരുന്നു. വെള്ളിയാഴ്ച രാവിലെ ഹാജരാകാമെന്ന് സരിത അന്വേഷണ ഉദ്യോഗസ്ഥനെ അറിയിക്കുകയും ചെയ്തിരുന്നു. 

ലൈംഗിക പീഡന കേസില്‍ മുന്‍ മുഖ്യമന്ത്രി ഉമ്മന്‍ചാണ്ടി, കെ സി വേണുഗോപാല്‍ എംപി  എന്നിവര്‍ക്കെതിരെ ക്രൈംബ്രാഞ്ച്  കേസ് രജിസ്റ്റര്‍ ചെയ്തിരുന്നു. ഉമ്മന്‍ചാണ്ടിക്കെതിരെ പ്രകൃതിവിരുദ്ധ പീഡനത്തിനും വേണുഗോപാലിനെതിരെ ബലാല്‍സംഗത്തിനുമാണ് കേസെടുത്തത്. 

ബലാല്‍സംഗ കേസില്‍ ഇരയുടെ രഹസ്യമൊഴി നിര്‍ബന്ധമാണ്. സരിതയുടെ രഹസ്യമൊഴി എടുക്കുന്നതിന് ക്രൈംബ്രാഞ്ച് ചീഫ് ജുഡീഷ്യല്‍ മജിസ്‌ട്രേറ്റ് കോടതിയില്‍ അപേക്ഷ നല്‍കിയിരുന്നു. തിരുവനന്തപുരം ഒന്നാം ക്ലാസ് മജിസ്‌ട്രേറ്റ് കോടതി ഒന്ന് സരിതയുടെ രഹസ്യമൊഴി രേഖപ്പെടുത്തുമെന്ന് കോടതി ഉത്തരവിടുകയും ചെയ്തിരുന്നു. 

സരിതയുടെ രഹസ്യമൊഴി രേഖപ്പെടുത്തിയശേഷം മാത്രം തുടര്‍നടപടികളുമായി മുന്നോട്ടുപോയാല്‍ മതിയെന്നാണ് അന്വേഷണ സംഘത്തിന്റെ തീരുമാനം. സരിത നല്‍കുന്ന മൊഴിയുടെ വിശദാംശങ്ങള്‍ വിലയിരുത്തിയ ശേഷമാകും തുടര്‍നടപടി സ്വീകരിക്കുക എന്നാണ് റിപ്പോര്‍ട്ട്. കേസില്‍ എഫ്‌ഐആര്‍ ക്രൈംബ്രാഞ്ച് കോടതിയില്‍ സമര്‍പ്പിച്ചിരുന്നു. 
 

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ

Related Stories

No stories found.
logo
Samakalika Malayalam
www.samakalikamalayalam.com