തിരുവനന്തപുരം: ലോക്കോ പൈലറ്റുമാരില്ലാത്തതു കാരണം തിരുവനന്തപുരം ഡിവിഷനിലെ പത്ത് പാസഞ്ചർ ട്രെയിനുകൾ ഇന്ന് ഓടില്ല. അറ്റകുറ്റപ്പണികൾക്കു പുറമേ ജീവനക്കാരുടെ കുറവും ട്രെയിനുകൾ റദ്ദാക്കാൻ കാരണമായെന്നാണ് റെയിൽവെയുടെ ഔദ്യോഗിക സ്ഥിരീകരണം. ഗുരുവായൂർ-തൃശ്ശൂർ, പുനലൂർ-കൊല്ലം, ഗുരുവായൂർ-പുനലൂർ, എറണാകുളം-കായംകുളം സെഷനുകളിലെ പാസഞ്ചർ തീവണ്ടികളാണ് റദ്ദാക്കിയിട്ടുള്ളത്. തൃശ്ശൂർ-കോഴിക്കോട് പാസഞ്ചർ ഭാഗികമായി റദ്ദാക്കിയിട്ടുണ്ട്.
മാസങ്ങളായി തീവണ്ടി റദ്ദാക്കുന്നത് അറ്റകുറ്റപ്പണികൾക്കുവേണ്ടിയാണെന്ന് അറിയിച്ചിരുന്ന റെയിൽവെ ആദ്യമായാണ് ജീവനക്കാരുടെ കുറവുണ്ടെന്ന വസ്തുത അംഗീകരിക്കുന്നത്. ലോക്കോ പൈലറ്റ് തസ്തികയിൽ ഏറെകാലമായി തസ്തികകൾ ഒഴിഞ്ഞുകിടക്കുന്നതും പ്രളയബാധിതപ്രദേശങ്ങളിൽ താമസിച്ചിരുന്ന 20ഓളം ലോക്കോ പൈലറ്റുമാർ ദുരിതാശ്വാസ ക്യാമ്പുകളിലാണെന്നതും സ്ഥിതി രൂക്ഷമാക്കി. തിരുവനന്തപുരം ഡിവിഷനിൽ 525 ലോക്കോ പൈലറ്റ് തസ്തികകളുള്ളതിൽ 420 പേർ മാത്രമാണുള്ളത്. സംസ്ഥാനത്തെ എല്ലാ പാസഞ്ചർ ട്രെയിനുകളും തിരക്കുള്ളവയായതിനാൽ അപ്രതീക്ഷിത റദ്ദാക്കൽ യാത്രക്കാരെ വലയ്ക്കുന്നതാണ്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
