കൊച്ചി: സഹപ്രവര്ത്തകയ്ക്കു നീതി തേടി സമരം ചെയ്യുന്ന കന്യാസ്ത്രീകള്ക്കെതിരെ കേരള കാത്തലിക് ബിഷപ്സ് കൗണ്സില് (കെസിബിസി) രംഗത്ത്. കന്യാസ്ത്രീകളുടെ സമരം അതിരുകടന്നതാണെന്ന് വാര്ത്താക്കുറിപ്പില് കുറ്റപ്പെടുത്തിയ കെസിബിസി സഭയെയും ബിഷപ്പുമാരെയും അടച്ചാക്ഷേപിക്കാന് ശ്രമം നടക്കുകയാണെന്നും ആരോപിച്ചു.
സമ്മര്ദത്തിനു വഴങ്ങാതെ പൊലീസ് അന്വേഷണം പൂര്ത്തിയാക്കണം. നിഷ്പക്ഷ അന്വേഷണത്തിലൂടെ കണ്ടെത്തുന്ന കുറ്റവാളിയെ നിയമപ്രകാരം ശിക്ഷിക്കണം. കുറ്റവാളി ആരായാലും ശിക്ഷിക്കപ്പെടണമെന്നാണു കത്തോലിക്കാ സഭയുടെ നിലപാട്. നിയമവാഴ്ച നടക്കണം. മാധ്യമങ്ങളുടെ സമാന്തര അന്വേഷണവും വിചാരണയുമല്ല വേണ്ടത്. സഭ ആരെയും വിധിക്കുന്നില്ല, നീതീകരിക്കുന്നുമില്ലെന്നും തിരുവനന്തപുരം ലത്തീന് അതിരൂപതാ ആര്ച്ച് ബിഷപ്പ് ഡോ. എം.സൂസപാക്യം പറഞ്ഞു.
അഞ്ച് കന്യാസ്ത്രീകളെ മുന്നില്നിര്ത്തി ചില നിക്ഷിപ്ത താത്പര്യക്കാരും ചില മാധ്യമങ്ങളും ചേര്ന്ന് നടത്തുന്ന സമരം അതിരുകടക്കുന്നതും സഭയെയും ബിഷപ്പുമാരെയും അധിക്ഷേപിക്കുന്നതുമാണ്. കേസുമായി ബന്ധപ്പെട്ട് മൊഴികള് അടക്കമുള്ളവ മാധ്യമങ്ങളിലൂടെ പുറത്തു വന്നുകൊണ്ടിരിക്കുന്നു. ആരെയെങ്കിലും ആക്ഷേപിക്കുന്ന തരത്തില് മാധ്യമങ്ങള് വാര്ത്ത നല്കുന്നത് ശരിയല്ലന്നും കെസിബിസി അറിയിച്ചു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ