മലപ്പുറം:കല്പകഞ്ചേരിയില് കഞ്ചാവും പണവും നല്കി പ്രലോഭിപ്പിച്ച് പ്രായപൂര്ത്തിയാവാത്ത അഞ്ചു ആണ്കുട്ടികളെ പ്രകൃതി വിരുദ്ധ പീഡനത്തിന് ഇരയാക്കി. സംഭവത്തില് ആറുപേരെ കല്പകഞ്ചേരി പൊലീസ് അറസ്റ്റ് ചെയ്തു. അറസ്റ്റിലായ ആറുപേരില് രണ്ടുപേര് എഴുപതു വയസിനു മുകളില് പ്രായമുള്ളവരാണ്.ഇരിങ്ങാവൂര് സ്വദേശികളായ ഉണ്ണീന്കുട്ടി , കോയഹാജി, മുഹമ്മദ് ബഷീര്, സിദ്ദിഖ്, മുഹമ്മദ് സുഹൈല്, അബ്ദുള് സലാം, എന്നിവരാണ് പ്രതികള്. ഇതില് ഉണ്ണീന് കുട്ടിയും കോയഹാജിയുടേയും പ്രായം എഴുപതു വയസിനു മുകളിലാണ്.
കഴിഞ്ഞമാസമാണ് കേസിനാസ്പദമായ സംഭവം നടന്നത്.പത്താം ക്ലാസ് പരീക്ഷയുടെ അവസാന ദിവസം പരീക്ഷ കഴിഞ്ഞ് വീട്ടിലെത്തിയ കുട്ടിയുടെ പെരുമാറ്റത്തില് അസ്വാഭാവികത കണ്ട് രക്ഷിതാക്കള് ചോദ്യം ചെയ്തതാണ് പീഡന വിവരം അറിയാന് കാരണം. ചൈല്ഡ് ലൈന് പ്രവര്ത്തകര് കുട്ടിയെ കൂടുതല് ചോദ്യം ചെയ്തപ്പോഴാണ് കൂടുതല് കുട്ടികള് പീഡനത്തിനിരയായ വിവരം മനസിലായത്.
കേസ് പൊലിസ് അന്വേഷിച്ചതോടെയാണ് പ്രതികളെ കുറിച്ചുള്ള വിവരങ്ങള് ലഭിച്ചത്. 15 പേരാണ് ഈ സംഘത്തിലുള്ളത്.ആറുപേരെ അറസ്റ്റ് ചെയ്തതിന് പുറമേ നാലുപേരെ കുറിച്ചുള്ള സൂചന പൊലിസിന് ലഭിച്ചിട്ടുണ്ട്.കഞ്ചാവും പണവും നല്കി പ്രലോഭിച്ചാണ് പ്രകൃതി വിരുദ്ധ പീഡനത്തിനിരയാക്കിയത്.തിരൂര് കോടതിയില് ഹാജരാക്കിയ പ്രതികളെ റിമാന്ഡു ചെയ്തു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ