തിരുവനന്തപുരം: ലോക്‌സഭാ തെരഞ്ഞെടുപ്പ് പ്രചാരണത്തിനായി കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി കേരളത്തിലെത്തി. രാത്രി 10.40 ന് തിരുവനന്തപുരത്തെത്തിയ രാഹുല്‍ ഗാന്ധി ഇന്നും നാളെയും സംസ്ഥാനത്ത് വിവിധ തെരഞ്ഞെടുപ്പ് യോഗങ്ങളിൽ സംബന്ധിക്കും. ചൊവ്വാഴ്ച രാവിലെ ഹെലികോപ്റ്ററിൽ കൊല്ലത്തെത്തുന്ന അദ്ദേഹം പത്തിനു പത്തനാപുരത്തു നടക്കുന്ന യുഡിഎഫ് തെരഞ്ഞെടുപ്പു യോഗത്തിൽ പ്രസംഗിക്കും. 11.30നു പത്തനംതിട്ടയിലെ യോഗത്തിലും പങ്കെടുക്കും.
അതിനുശേഷം, അന്തരിച്ച കേരള കോണ്‍ഗ്രസ്- എം നേതാവ് കെ.എം. മാണിയുടെ പാലായിലെ വീട്ടിലെത്തി കുടുംബാംഗങ്ങളെ അനുശോചനമറിയിക്കും. വൈകീട്ട് നാലിന് ആലപ്പുഴയിൽ നടക്കുന്ന തെരഞ്ഞെടുപ്പ് യോഗത്തിലും രാഹുൽ സംബന്ധിക്കും. ഹെലികോപ്റ്റർ മാർഗം തിരുവനന്തപുരത്ത് എത്തുന്ന രാഹുൽ ഗാന്ധി വൈകീട്ട് ആറിന് സെൻട്രൽ സ്റ്റേഡിയത്തിൽ നടക്കുന്ന യുഡിഎഫിന്‍റെ തെരഞ്ഞെടുപ്പ് സമ്മേളനത്തിൽ പങ്കെടുക്കും.
ഇതിന് ശേഷം രാഹുൽ വിമാനമാർഗം കണ്ണൂരിലേക്കു പോകും. കണ്ണൂരിൽ തങ്ങുന്ന രാഹുൽ ഗാന്ധി നാളെ സ്ഥാനാര്‍ഥിയെന്ന നിലയില്‍ വയനാട്ടിലെ പ്രചാരണ പരിപാടികളില്‍ പങ്കെടുക്കും. വയനാട് മണ്ഡലത്തിലുൾപ്പെടുന്ന വയനാട്, മലപ്പുറം, കോഴിക്കോട് ജില്ലയിലെ വിവിധ പ്രദേശങ്ങളിലെ തെരഞ്ഞെടുപ്പു യോഗങ്ങളിൽ പ്രസംഗിക്കും.
പിതാവ് രാജീവ്ഗാന്ധിയുടെ ചിതാഭസ്മം നിമജ്ജനം ചെയ്ത തിരുനെല്ലി പാപനാശിനിയിൽ ദർശനം നടത്തുന്നതും പരിപാടിയിലുണ്ട്. എസ്പിജിയുടെയും പൊലീസിന്‍റെയും സുരക്ഷാ റിപ്പോർട്ടിന്റെ അടിസ്ഥാനത്തിലാകും ഇക്കാര്യത്തിൽ അന്തിമ തീരുമാനമെടുക്കുക.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
