കുട്ടനാട് ആശങ്കയില്‍; മടവീണ് മൂന്നു പാടശേഖരങ്ങള്‍ വെളളത്തില്‍, ആളുകളെ ഒഴിപ്പിക്കുന്നു, റോഡുകളും മുങ്ങി
By സമകാലികമലയാളം ഡെസ്‌ക്‌ | Published: 11th August 2019 11:25 AM |
Last Updated: 11th August 2019 11:25 AM | A+A A- |
ആലപ്പുഴ: കിഴക്കന്‍ വെളളത്തിന്റെ വരവ് കൂടിയതോടെ കുട്ടനാട് ആശങ്കയില്‍. കുപ്പപ്പുറത്ത് മടവീണ് മൂന്നു പാടശേഖരങ്ങള്‍ വെളളത്തിന്റെ അടിയിലായി. ഇവിടെ നിരവധി വീടുകളില്‍ വെളളം കയറി. തുടര്‍ന്ന് ജനങ്ങളെ വീടുകളില്‍ നിന്ന് ഒഴിപ്പിച്ച് ക്യാമ്പുകളിലേക്ക് മാറ്റുകയാണ്. കോട്ടയത്തിന്റെ പടിഞ്ഞാറന്‍മേഖലകളിലും ജലനിരപ്പ് ഉയര്‍ന്നതിനെ തുടര്‍ന്ന് വീടുകളില്‍ നിന്ന് ജനങ്ങളെ ഒഴിപ്പിക്കുന്നത് തുടരുകയാണ്.
അതേസമയം ജലനിരപ്പ് ഉയര്‍ന്നതിനെ തുടര്‍ന്ന് ആലപ്പുഴ- ചങ്ങനാശേരി എസി റോഡില്‍ ഗതാഗതം പൂര്‍ണമായി തടസ്സപ്പെട്ടു. കെഎസ്ആര്‍ടിസി സര്‍വീസുകള്‍ നിര്‍ത്തിവെച്ചു. കോട്ടയത്ത് നിന്നും ചേര്‍ത്തല, കുമരകം, ആലപ്പുഴ, മൂന്നാര്‍ എന്നിഭാഗങ്ങളിലേക്കുളള സര്‍വീസും നിര്‍ത്തിവെച്ചിരിക്കുകയാണ്.
കഴിഞ്ഞതവണ കേരളത്തെ പിടിച്ചുകുലുക്കിയ പ്രളയത്തില്‍ ഏറ്റവുമധികം ദുരിതം അനുഭവിച്ചത് കുട്ടനാട്ടുകാരാണ്. മാസങ്ങളോളം വീടുകളില്‍ വെളളക്കെട്ട് തുടര്‍ന്നതിനെ തുടര്‍ന്ന് ക്യാമ്പുകളിലാണ് നിരവധിപ്പേര്‍ കഴിഞ്ഞത്.
