ആശങ്ക തീര്‍ത്ത കുറിച്യാര്‍മല; ഉരുള്‍പൊട്ടലിനൊപ്പം മലമുകളിലെ ജലാശയവും ഒഴുകി വന്നേക്കുമെന്ന് മുന്നറിയിപ്പ്
By സമകാലിക മലയാളം ഡെസ്‌ക്‌ | Published: 16th August 2019 06:34 AM |
Last Updated: 16th August 2019 07:01 AM | A+A A- |
വയനാട്: തുടര്‍ച്ചയായ രണ്ടാം വര്‍ഷവും ഉരുള്‍പൊട്ടലുണ്ടായതിന് പിന്നാലെ വയനാട് കുറിച്യാര്‍മല വന്‍ ഭീഷണി ഉയര്‍ത്തുന്നു. ഇവിടെ ഉരുള്‍പൊട്ടലുണ്ടായ മേഖലയിലെ വിള്ളല്‍ മലമുകളിലുള്ള വലിയ ജലാശയത്തിന് തൊട്ടടുത്തെത്തിയതായാണ് മണ്ണ് സംരക്ഷണ വകുപ്പ് അറിയിച്ചത്.
ഇനിയും മണ്ണിടിച്ചില്‍ ഉണ്ടായാല്‍ ഈ ജലാശയവും താഴേക്ക് പതിക്കുമെന്നാണ് മുന്നറിയിപ്പ്. ഇതോടെ താഴ് വരയില്‍ താമസിക്കുന്ന ഇരുനൂറോളം കുടുംബങ്ങളെ മാറ്റിത്താമസിപ്പിച്ചു. കുറിച്യാര്‍മലയില്‍ വലിയ ഉരുള്‍പ്പൊട്ടലുണ്ടായതിന്റെ പ്രഭവ കേന്ദ്രത്തില്‍ നിന്ന് വളരെ അടുത്താണ് ഈ തടാകം. മലയില്‍ 60 മീറ്റര്‍ നീളവും 10 മീറ്റര്‍ ആഴവുമുള്ള വന്‍ ഗര്‍ത്തമാണ് രൂപപ്പെട്ടിരിക്കുന്നത്.
തടാകത്തിലെ വെള്ളവും മണ്ണും കല്ലും മരങ്ങളുമെല്ലാം മലവെള്ളത്തിനൊപ്പം ഒലിച്ചിറങ്ങിയാല്‍ ദുരന്തത്തിന്റെ വ്യാപ്തി ഭീകരമായിരിക്കുമെന്നാണ് മുന്നറിയിപ്പ്. ശനിയാഴ്ചയോടെ വിദഗ്ധ സംഘം ഈ പ്രദേശത്തെത്തി പരിശോധന നടത്തും. ഇതിന് ശേഷമാവും ഈ സ്ഥലം വാസയോഗ്യമാണോ എന്ന് തീരുമാനിക്കുക.
