തിരുവനന്തപുരം: ശബരിമലയില് ദര്ശനം നടത്തിയത് രണ്ട് യുവതികള് മാത്രമെന്ന് ദേവസ്വം മന്ത്രി കടകംപള്ളി സുരേന്ദ്രന് നിയമസഭയെ അറിയിച്ചു.ശബരിമല എക്സ്ക്യൂട്ടീവ് ഓഫീസറുടെ റിപ്പോര്ട്ടിന്റെ അടിസ്ഥാനത്തിലാണ് മന്ത്രിയുടെ പ്രതികരണം. ശ്രീലങ്കന് സ്വദേശിനി ദര്ശനം നടത്തിയതിന് സ്ഥിരീകരണമില്ലെന്നും അദ്ദേഹം ചോദ്യോത്തരവേളയില് അറിയിച്ചു.
ശബരിമലയില് ദര്ശനം നടത്തിയത് 51 യുവതികള് ആണെന്നാണ് സര്ക്കാര് ആദ്യം സുപ്രിംകോടതിയില് സത്യവാങ്മൂലം സമര്പ്പിച്ചിരുന്നത്. എന്നാല് ഇതില് പുരുഷന്മാരും 50 വയസ്സ് കഴിഞ്ഞവരും ഉള്പ്പെട്ടിരുന്നതായി തെളിഞ്ഞു. തുടര്ന്ന് ഈ പട്ടിക പുനഃപരിശോധിച്ച ആഭ്യന്തര വകുപ്പ് 17 പേരുടെ ലിസ്റ്റ്് തയ്യാറാക്കുകയും ചെയ്തു. എന്നാല് ഇപ്പോള് രണ്ട് യുവതികളുടെ കാര്യത്തില് മാത്രമെ സ്ഥിരീകരണമുള്ളു എന്ന നിലപാടാണ് സര്ക്കാര് നിയമസഭയില് സ്വീകരിച്ചിരിക്കുന്നത്.
ദര്ശനം ആവശ്യപ്പെട്ട് വരുന്ന യുവതികള്ക്ക് ശബരിമലയില് സുരക്ഷ ഒരുക്കണമെന്ന് സുപ്രീംകോടതി നിര്ദ്ദേശം ലഭിച്ചിട്ടില്ലെന്നും മന്ത്രി വ്യക്തമാക്കി. ശബരിമല തന്ത്രി ദേവസ്വം ജീവനക്കാരന് അല്ല. ദേവസ്വം മാന്വല് പ്രകാരം മറ്റ് ജീവനക്കാരെപ്പോലെ തന്നെ തന്ത്രി പ്രവര്ത്തിക്കണം.ക്ഷേത്രത്തില് ആചാരലംഘനമുണ്ടായാല് നടയടച്ച് ശുദ്ധിക്രിയ ചെയ്യാന് ദേവസ്വം മാന്വലില് ശുപാര്ശ ചെയ്യുന്നില്ല. ശുദ്ധിക്രിയ ആവശ്യമെങ്കില് ദേവസ്വം ബോര്ഡിനോട് കൂടിയാലോചന നടത്തിയ ശേഷം മാത്രം ശുദ്ധിക്രിയ നടത്താം. ശുദ്ധിക്രിയ ചെയ്തപ്പോള് അനുമതി വാങ്ങാത്തതിനാലാണ് വിശദീകരണം ചോദിച്ചത്. ശബരിമല ആചാര വിശ്വാസ സംരക്ഷണത്തില് തീരുമാനമെടുക്കേണ്ടത് തന്ത്രിയില് മാത്രം നിക്ഷിപ്തമല്ലെന്നും മന്ത്രി നിയമസഭയെ അറിയിച്ചു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ