നാദാപുരം: വഴിയില്‍ കിടന്നിരുന്ന ബോംബ് പൊട്ടി സഹോദരിമാര്‍ക്ക് പരിക്ക്. വളയം കുയ്‌തേരിയില്‍ സ്റ്റീല്‍ ബോംബ് പൊട്ടിയാണ് അംന ഫാത്തിമ(11), നാദിയ(8) എന്നിവര്‍ക്ക് പരിക്കേറ്റത്. കുരുടിക്കണ്ടിയില്‍ ഒ.പി.മുജീബിന്റേയും സീനത്തിന്റേയും മക്കളാണ് ഇവര്‍.
ബുധനാഴ്ച രാവിലെ എട്ടേകാലോടെ കുട്ടികള്‍ മദ്‌റസ വിട്ട് തിരിച്ചു വരുമ്പോഴാണ് സംഭവം. ഇടവഴിയില്‍ എന്തോ കിടക്കുന്നത് കണ്ട കുട്ടികള്‍ ഇത് ബോംബാണെന്ന് അറിയാതെ ചവിട്ടി തെറിപ്പിച്ചു. ഇതോടെ ഇടവഴിയോട് ചേര്‍ന്നുള്ള മതിലില്‍ തട്ടി ബോംബ് വലിയ ശബ്ദത്തോടെ പൊട്ടിത്തെറിച്ചു.
കുട്ടികള്‍ക്ക് സാരമായി പരിക്കേറ്റിട്ടുണ്ട്. ഓടിക്കൂടിയ നാട്ടുകാരാണ് കുട്ടികളെ ആശുപത്രിയിലെത്തിച്ചത്. വിദഗ്ധ ചികിത്സയ്ക്കായി കുട്ടികളെ വടകരയിലേക്ക് മാറ്റി. നാദിയയുടെ ഇരുകാലുകള്‍ക്കും വയറിനും പരിക്കേറ്റു. നെഞ്ചിലാണ് അംനയ്ക്ക് പരിക്കേറ്റത്. ബോംബ് സ്‌ക്വാഡ് സ്ഥലത്തെത്തി പരിശോധന നടത്തി. ഉഗ്രസ്‌ഫോടനശേഷിയുള്ള ബോംബാണ് പൊട്ടിത്തെറിച്ചതെന്ന് ബോംബ് സ്‌ക്വാഡ് അംഗങ്ങള്‍ പറഞ്ഞു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
