കണ്ണൂർ: കർണ്ണാടക രാഷ്‌ട്രീയത്തിൽ അനിശ്ചിതത്വങ്ങൾ തുടരുമ്പോൾ ബിജെപി നേതാവ് യെദിയൂരപ്പയ്ക്കുവേണ്ടി കേരളത്തിൽ പ്രത്യേക വഴിപാടുകൾ. തളിപ്പറമ്പിലെ പ്രശസ്തമായ രാജരാജേശ്വര ക്ഷേത്രത്തിലാണ് യെദിയൂരപ്പയുടെ പേരിൽ പ്രത്യേക വഴിപാടുകൾ നടത്തുന്നത്.
അനിഴം നക്ഷത്രക്കാരനായ യെദിയൂരപ്പയുടെ പേരിൽ കഴിഞ്ഞ ദിവസം ക്ഷേത്രത്തിലെ പ്രധാന വഴിപാടായ പൊന്നുംകുടം സമർപ്പണം നടത്തി. മറ്റൊരു പ്രധാന വഴിപാടായ പട്ടം താലി സമർപ്പണവും നെയ്‌വിളക്ക് സമർപ്പണവും ഈ ദിവസങ്ങളിൽ നടത്തിയിരുന്നു.
മുൻപ് പല തവണ രാജരാജേശ്വര ക്ഷേത്രത്തിൽ ദർശനം നടത്തിയിട്ടുണ്ട് യെഡിയൂരപ്പ. ഇന്ന് നടക്കുന്ന വിശ്വാസവോട്ടെടുപ്പിൽ ബിജെപി വിജയിച്ചാൽ യെദിയൂരപ്പ വീണ്ടും ക്ഷേത്രത്തിലെത്തുമെന്നും റിപ്പോർട്ടുകളുണ്ട്. ഒരു വിശ്വസ്ത സുഹൃത്ത് വഴിയാണു ഇപ്പോൾ ക്ഷേത്ര വഴിപാടുകൾ നടത്തുന്നത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
