കോട്ടയം : കേരള കോണ്ഗ്രസില് സമവായ നീക്കം പൊളിയുന്നു. സംസ്ഥാന കമ്മിറ്റി വിളിച്ചുചേര്ക്കാന് നിര്ദേശം നല്കണമെന്ന് ആവശ്യപ്പെട്ട് ജോസ് കെ മാണി തെരഞ്ഞെടുപ്പ് കമ്മീഷന് കത്തുനല്കി. ഇതില് രണ്ട് എംപിമാരും രണ്ട് എംഎല്എമാരും കത്തില് ഒപ്പുവെച്ചിട്ടുണ്ട്. സംസ്ഥാന കമ്മിറ്റി വിളിച്ചുചേര്ക്കാന് പി ജെ ജോസഫിന് നിര്ദേശം നല്കണമെന്ന് കത്തില് ആവശ്യപ്പെട്ടിട്ടുണ്ട്. എംപിമാരായ ജോസ് കെ മാണി, തോമസ് ചാഴിക്കാടന്, എംഎല്എമാരായ റോഷി അഗസ്റ്റിന്, എന് ജയരാജ് എന്നിവരാണ് കത്തില് ഒപ്പുവെച്ചിട്ടുള്ളത്.
കെ എം മാണിയുടെ നിര്യാണത്തോടെ, സംസ്ഥാന കമ്മിറ്റി വിളിച്ചുകൂട്ടി പുതിയ ചെയര്മാനെ തെരഞ്ഞെടുത്തിട്ടില്ല. പി ജെ ജോസഫ് വര്ക്കിംഗ് ചെയര്മാന് മാത്രമാണ്. അദ്ദേഹത്തിന് താല്ക്കാലിക ചുമതല മാത്രമാണ് നല്കിയിട്ടുള്ളത്. പിജെ ജോസഫിനെ ചെയര്മാനായി തെരഞ്ഞെടുത്തു എന്ന് അറിയിച്ചുകൊണ്ടുള്ള പാര്ട്ടി സംഘടാന ചുമതലയുള്ള ജനറല് സെക്രട്ടറി ജോയ് എബ്രഹാമിന്റെ കത്തും ജോസ് കെ മാണി വിഭാഗം തള്ളി.
ജോയ് എബ്രഹാമിന് പാര്ട്ടിയില് സവിശേഷ അധികാരമില്ല. പാര്ട്ടിയിലെ നിരവധി ജനറല് സെക്രട്ടറിമാരില് ഒരാള് മാത്രമാണ് ജോയ് എബ്രഹാം എന്നും ജോസ് കെ മാണി വിഭാഗം കത്തില് ചൂണ്ടിക്കാട്ടുന്നു. അതിനാല് തന്നെ പി ജെ ജോസഫ് നേരത്തെ കമ്മീഷന് നല്കിയ കത്തിന് ആധികാരികതയില്ല. സംസ്ഥാന കമ്മിറ്റി വിളിച്ചുചേര്ക്കണമെന്ന ആവശ്യം ജോസഫ് ഇതുവരെ അംഗീകരിച്ചിട്ടില്ലെന്നും കത്തില് ചൂണ്ടിക്കാട്ടുന്നു. ജോസ് കെ മാണിയെ പാര്ട്ടി ചെയര്മാനാക്കണമെന്ന് ആവശ്യപ്പെട്ട് കഴിഞ്ഞ ദിവസം കേരള കോണ്ഗ്രസിന്റെ എട്ട് ജില്ലാ പ്രസിഡന്റുമാര് രംഗത്തുവന്നിരുന്നു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ