തിരുവനന്തപുരം: കടന്നൽ കുത്തേറ്റു മരണപ്പെട്ടാൽ നഷ്ടപരിഹാരം നൽകുമെന്ന് വനമന്ത്രി കെ രാജു. കടന്നൽ /തേനീച്ച എന്നിവ വന്യജീവി സംരക്ഷണ നിയമത്തിലെ പട്ടികയിൽ ഉൾപ്പെടുന്നവ അല്ലാത്തതിനാൽ അവയുടെ കുത്തേറ്റു മരണപ്പെട്ടാൽ നഷ്ടപരിഹാരം ലഭിക്കുമായിരുന്നില്ല. എന്നാൽ ഇനിമുതൽ വനത്തിനു പുറത്ത് വച്ചു പാമ്പു കടിയേറ്റു മരിക്കുന്നവരുടെ ആശ്രിതർക്ക് നൽകുന്ന അതേ തുക(2,00,000 രൂപ) കടന്നൽകുത്തേറ്റ് മരിക്കുന്നവരുടെ ആശ്രിതർക്കും ലഭിക്കുന്ന വിധത്തിൽ ചട്ടങ്ങൾ ഭേദഗതി ചെയ്യുമെന്ന് വനമന്ത്രി അറിയിച്ചു. ഔദ്യോഗിക ഫേസ്ബുക്ക് പേജിൽ അദ്ദേഹം ഇത് വ്യക്തമാക്കി.
കെ രാജുവിന്റെ ഫേസ്ബുക്ക് കുറിപ്പിന്റെ പൂർണ്ണരൂപം
കടന്നൽ കുത്തേറ്റു മരണപ്പെട്ടാലും നഷ്ട പരിഹാരം നൽകും.
വനത്തിനു പുറത്ത് വച്ചു പാമ്പു കടിയേറ്റു മരിക്കുന്നവരുടെ ആശ്രിതർക്ക് നൽകുന്ന അതേ തുക(200000 രൂപ) കടന്നൽകുത്തേറ്റ് മരിക്കുന്നവരുടെ ആശ്രിതർക്കും ലഭിക്കുന്ന വിധത്തിൽ ചട്ടങ്ങൾ ഭേദഗതി ചെയ്യും.
കടന്നൽ /തേനീച്ച എന്നിവ വന്യജീവി സംരക്ഷണ നിയമത്തിലെ പട്ടികയിൽ പെടുന്നവ അല്ലാത്തതിനാൽ അവയുടെ കുത്തേറ്റു മരണപ്പെട്ടാൽ നഷ്ടപരിഹാരം ലഭിക്കുമായിരുന്നില്ല. നഷ്ടപരിഹാരം നൽകുന്നതിന് സർക്കാർ സർവീസിലെ സിവിൽ സർജനിൽ കുറയാത്ത മെഡിക്കൽ ഓഫീസറുടെ സാക്ഷ്യപത്രം വേണമെന്ന വ്യവസ്ഥ മാറ്റി രജിസ്റ്റേർഡ് മെഡിക്കൽ ഓഫീസറുടെ സാക്ഷ്യപത്രം മതി എന്നും ഭേദഗതി ചെയ്യും. വന്യജീവി ആക്രമണത്തിൽ പരിക്കേറ്റു ചികിത്സയിൽ ദാരിദ്ര്യ രേഖയ്ക്ക് താഴെ ഉള്ളവർക്ക് ചികിത്സാ കാലയളവിൽ ഓരോ ദിവസവും 200 രൂപ വീതം സമാശ്വാസ തുകയും നൽകും.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
