തിരുവനന്തപുരം: രജിസ്ട്രാർ ഓഫീസിലെ നോട്ടീസ് ബോർഡിലെ അറിയിപ്പ് കീറിമാറ്റി രഹസ്യം സൂക്ഷിക്കുന്ന പഴയ രീതി ഇനി നടപ്പില്ല. പ്രണയമാണെങ്കിലും അല്ലെങ്കിലും രജിസ്റ്റർ വിവാഹം ഇനി രഹസ്യമല്ല. അപേക്ഷകരുടെ ഫോട്ടോയും വിലാസവും ഇനി രജിസ്ട്രേഷൻ വകുപ്പിന്റെ വെബ്സൈറ്റിൽ കാണാനാകും. രജിസ്ട്രാർ ഓഫീസിലെ നോട്ടീസ് ബോർഡിൽ മാത്രം ഒതുങ്ങിയിരുന്ന അറിയിപ്പാണ് ഇനി ചിത്രം സഹിതം വെബ്സൈറ്റിൽ പ്രത്യക്ഷപ്പെടുക.
സ്പെഷൽ മാര്യേജ് ആക്ട് പ്രകാരമുള്ള വിവാഹ രജിസ്ട്രേഷന് അപേക്ഷ നൽകുന്നവരുടെ വിവരമാണ് ഫോട്ടോസഹിതം വെബ്സെറ്റിൽ പ്രസിദ്ധീകരിക്കാൻ നടപടി സ്വീകരിച്ചിട്ടുള്ളത്. വിവാഹം രജിസ്റ്റർ ചെയ്യുന്നതിനുള്ള അപേക്ഷ സ്വീകരിച്ച് വിവരം പരസ്യപ്പെടുത്തുകയും ആക്ഷേപം സ്വീകരിച്ച് തീർപ്പാക്കുകയും വേണമെന്നാണ് ചട്ടം. എന്നാൽ നിലവിൽ അപേക്ഷ സ്വീകരിച്ചശേഷം, വിവരം അറിയിച്ചുകൊണ്ട് വകുപ്പിന്റെ ബോർഡിൽ തൂക്കുന്ന നോട്ടീസ് മണിക്കൂറുകൾക്കകം അപ്രത്യക്ഷമാകുന്നതായി പരാതികൾ വ്യാപകമായിരുന്നു.
ഇതേത്തുടർന്നാണ് വിവാഹ രജിസ്ട്രേഷൻ നോട്ടീസ് വകുപ്പിന്റെ വെബ്സൈറ്റിൽ പ്രദ്ധീകരിക്കാൻ തീരുമാനിച്ചത്. സൈറ്റിൽ സ്പെഷൽ മാര്യേജ് നോട്ടീസ് പരിശോധിച്ചാൽ സംസ്ഥാനത്തെ എല്ലാ സബ് രജിസ്ട്രാർ ഓഫിസുകളിലും വിവാഹ രജിസ്ട്രേഷൻ നോട്ടീസ് നൽകിയവരുടെ വിവരം ഫോട്ടോ സഹിതം അറിയാനാകും. അതേസമയം, വിദേശികളെ വിവാഹം കഴിക്കുന്നവരുടെ കാര്യത്തിൽ വിവരം പരസ്യപ്പെടുത്തുന്നതിന് സങ്കീർണതകൾ നിലനിൽക്കുകയാണ്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ