നെടുമ്പാശേരി: വിദേശത്തേക്ക് പോകുന്ന കാമുകിക്ക് യാത്രയയപ്പ് നല്‍കാന്‍ വിമാനത്താവളത്തില്‍ വേഷം മാറി വന്നതായിരുന്നു യുവാവ്. പെണ്‍കുട്ടിയുടെ വീട്ടുകാരുടെ കണ്ണുവെട്ടിക്കാന്‍ പര്‍ദ്ദ അണിഞ്ഞെത്തി. പക്ഷേ വിമാനത്താവളത്തിലെ സുരക്ഷ പരിശോധനയ്ക്ക് വിധേയമാകേണ്ടി വന്നതോടെ പെട്ടു.
കാമുകിയുടെ വീട്ടുകാരെ തെറ്റിദ്ധരിപ്പിച്ച് കൂട്ടുകാരിയെന്ന ഭാവത്തിലാണ് തൃശൂര്‍ സ്വദേശിയായ യുവാവ് പര്‍ദ്ദ ധരിച്ച് എത്തിയത്. വിമാനത്താവളത്തിലെ പാര്‍ക്കിങ് ഏരിയയില്‍ എത്തിയാണ് യുവാവ് വേഷം മാറിയത്. ഇത് ഡ്രൈവര്‍മാരില്‍ ചിലര്‍ കണ്ടു. അവരത് വിമാനത്താവളത്തിലെ സുരക്ഷാ ജീവനക്കാരെ അറിയിച്ചതോടെയാണ് പണി പാളിയത്.
സിസിടിവിയിലൂടെ വേഷം മാറി വരുന്ന യുവാവിനെ സുരക്ഷാ ഉദ്യോഗസ്ഥര്‍ നിരീക്ഷിച്ചു. ടെര്‍മിനല്‍ വരാന്തയില്‍ എത്തിയപ്പോള്‍ തന്നെ യുവാവിനെ പിടികൂടുകയും ചെയ്തു. കൂടുതല്‍ ചോദ്യം ചെയ്തപ്പോഴാണ് കാര്യങ്ങള്‍ പുറത്തുവന്നത്.
വേഷം മാറിയതിന് പിന്നില്‍ മറ്റ് ലക്ഷ്യങ്ങളൊന്നും ഇല്ലെന്ന് വ്യക്തമായതോടെ താക്കീത് നല്‍കി യുവാവിനെ വിട്ടയച്ചു. ദുബൈയിലേക്ക് പോവുകയായിരുന്ന തൃശൂര്‍ സ്വദേശിയായ പെണ്‍കുട്ടിയെ യാത്രയയക്കുവാനാണ് യുവാവ് എത്തിയത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
