സിനിമയെ വെല്ലുന്ന കൗമാരക്കാരന്റെ സാഹസിക ഓട്ടോ പ്രകടനം; ബൈക്കിലും പിന്നാലെ ഓടിയും പൊലീസ്, എസ്ഐക്ക് പരിക്ക്

നഗരത്തിലൂടെ അപകടകരമായ രീതിയിൽ ഓട്ടോറിക്ഷ ഓടിച്ച് പരിഭ്രാന്തി പരത്തിയ പതിനേഴുകാരനെ പൊലീസ്​ പിന്തുടർന്ന് പിടികൂടി
സിനിമയെ വെല്ലുന്ന കൗമാരക്കാരന്റെ സാഹസിക ഓട്ടോ പ്രകടനം; ബൈക്കിലും പിന്നാലെ ഓടിയും പൊലീസ്, എസ്ഐക്ക് പരിക്ക്

തൊടുപുഴ: നഗരത്തിലൂടെ അപകടകരമായ രീതിയിൽ ഓട്ടോറിക്ഷ ഓടിച്ച് പരിഭ്രാന്തി പരത്തിയ പതിനേഴുകാരനെ പൊലീസ്​ പിന്തുടർന്ന് പിടികൂടി. പ്രതിയെ വാഹനം തടഞ്ഞ് പിടികൂടുന്നതിനിടെ എസ്​ഐക്ക്​ പരിക്കേറ്റു. പരിക്കേറ്റ എസ്​ഐ തൊടുപുഴയിലെ സ്വകാര്യ ആശുപത്രിയിൽ ചികിത്സ തേടി.പ്രായപൂർത്തിയാകാത്തയാൾക്ക് വാഹനം നൽകിയതിനാൽ വാഹന ഉടമയ്ക്കെതിരെ കേസെടുക്കാൻ നടപടി സ്വീകരിക്കുമെന്നും ഓട്ടോയുടെ ടാക്സി രജിസ്ട്രേഷൻ റദ്ദുചെയ്യാൻ മോട്ടോർ വാഹനവകുപ്പിന്​ ശുപാർശ ചെയ്യുമെന്നും എസ്​ ഐ അറിയിച്ചു. 

ബുധനാഴ്​ച രാവിലെ പത്തേകാലോടെയായിരുന്ന സംഭവം. കാഞ്ഞിരമറ്റം സ്വദേശിയാണ് പിടിയിലായത്. തൊടുപുഴ അമ്പലം ബൈപാസിൽനിന്ന്​ രണ്ട് പെൺകുട്ടികളെ കയറ്റി മുട്ടം റോഡിലേക്ക്​ വരുകയായിരുന്ന ഓട്ടോ കണ്ട എസ്​ഐ നിർത്താൻ കൈകാണിച്ചു. എന്നാൽ, പതിനേഴുകാരൻ അമിതവേഗത്തിൽ തൊടുപുഴ പാലത്തിലിട്ട് ഓ​​ട്ടോ വട്ടംതിരിച്ച് തിരികെപ്പോകാൻ ശ്രമിച്ചു.

ഉടൻ പൊലീസ്​ വാഹനത്തിൽ നിന്നുമിറങ്ങിയ എസ്​ഐ എം പി  സാഗർ ഓട്ടോയുടെ പിറകെ ഓടിയെത്തി. സംഭവം ശ്രദ്ധയിൽപ്പെട്ട ട്രാഫിക് പൊലീസ്​ ഡിവൈഡർ ഉപയോഗിച്ച് റോഡിൽ ഓട്ടോ തടയാൻ ശ്രമിച്ചെങ്കിലും കൗമാരക്കാരൻ ഇതും ഇടിച്ചുതെറിപ്പിച്ചു. ഇതിനിടെ വാഹനത്തിലുണ്ടായിരുന്ന പെൺകുട്ടികളോട് പുറത്തേക്ക്​ ചാടാൻ ഇയാൾ പറഞ്ഞു. ഭയന്നുവിറച്ച കുട്ടികൾ ഓടുന്ന ഓട്ടോയിൽനിന്ന്​ ചാടിയിറങ്ങുകയായിരുന്നു. മുതലിയാർമഠം ഭാഗത്തേക്ക്​ ഓടിച്ചുപോകാൻ തിരിക്കുന്നതിനിടയിൽ രണ്ട് സ്​കൂട്ടറുകളിലും ബൈക്കുകളിലും ഓട്ടോ ഇടിച്ചു. എസ്​ ഐയും ട്രാഫിക് പൊലീസ്​ ഉദ്യോഗസ്ഥനും ഇയാളെ പിടികൂടുന്നതിനായി രണ്ട് ബൈക്ക് യാത്രക്കാരുടെ സഹായത്തോടെ പിന്നാലെപോയി. 

വാഹനം വേഗതകുറച്ചപ്പോൾ ബൈക്കിൽനിന്നിറങ്ങി ഓട്ടോയിൽ എസ്​ ഐയും ബൈക്ക് യാത്രക്കാരനും പിടുത്തമിട്ടതോടെ വാഹനത്തി​​െൻറ വേഗതകൂട്ടി പിന്നെയും പോവുകയായിരുന്നു. ഇതിനിടെ തെന്നിവീണ എസ്​ ഐയുടെ കൈവിരലിന്​ പരിക്കേറ്റു. തുടർന്ന് മുതലിയാർമഠം ഭാഗത്തേക്കുപോയ ഓട്ടോ റോഡുപണി നടക്കുന്നതിനാൽ മുമ്പോട്ടുപോകാൻ കഴിയാതെ നിർത്തുകയായിരുന്നു. ഉടൻ തന്നെ കൗമാരക്കാരനെ കസ്​റ്റഡിയിലെടുക്കുകയായിരുന്നു.

279 വകുപ്പ് പ്രകാരം കേസ്​ ചാർജ്​ ചെയ്ത്​ വൈദ്യപരിശോധന നടത്തി.  നഗരത്തിൽ രാവിലെയും വൈകീട്ടും ഓ​ട്ടോയുമായി ഇയാൾ ഓട്ടം പിടിക്കാറുണ്ടായിരു​ന്നുവെന്ന്​ പൊലീസ്​ പറഞ്ഞു. 

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ

Related Stories

No stories found.
logo
Samakalika Malayalam
www.samakalikamalayalam.com