തിരുവനന്തപുരം: എയര്ഗണ്ണില് നിന്ന് അബദ്ധത്തില് വെടിപൊട്ടി വായിലൂടെ തലയോട്ടിയില് തുളച്ചുകയറിയ വെടിയുണ്ട പുറത്തെടുത്തു. മെഡിക്കല് കോളജ് ആശുപത്രിയില് നടന്ന അതി സങ്കീര്ണ ശസ്ത്രക്രിയയിലൂടെയാണ് യുവാവിനെ രക്ഷപ്പെടുത്തിയത്.
തിരുവനന്തപുരം മെഡിക്കല് കോളജില് രണ്ടാഴ്ചയ്ക്കുള്ളില് ഇത് രണ്ടാം തവണയാണ് ശരീരത്തിനുള്ളില് കടന്ന അന്യവസ്തു പുറത്തെടുക്കുന്ന അതിസൂക്ഷ്മവും സങ്കീര്ണവുമായ ശസ്ത്രക്രിയ നടന്നത്. വര്ക്കല സ്വദേശിയായ 36 കാരനെയാണ് ഇത്തവണ വെടിയുണ്ട തലയോട്ടിയില് തറച്ചനിലയില് ആശുപത്രിയിലെത്തിച്ചത്. തുടര്ന്നായിരുന്നു ശസ്ത്രക്രിയ.
എയര്ഗണ് തുടച്ചു വൃത്തിയാക്കുന്നതിനിടെ വെടി പൊട്ടുകയും വെടിയുണ്ട വായിലൂടെ തലയോട്ടിയില് തുളച്ചുകയറുകയുമായിരുന്നു.ന്യൂറോ സര്ജറി വിഭാഗത്തില് പ്രവേശിപ്പിച്ച യുവാവിനെ അഡീഷണല് പ്രൊഫസറും ആശുപത്രി സൂപ്രണ്ടുമായ ഡോ. എം എസ് ഷര്മ്മദിന്റെ നേതൃത്വത്തില് ശസ്ത്രക്രിയയ്ക്ക് വിധേയനാക്കുകയായിരുന്നു.
മൈക്രോസ്കോപ്പ്, സിആം എന്നീ ഉപകരണങ്ങളുടെ സഹായത്തോടെ വായിലൂടെ തന്നെ നടത്തിയ ശസ്ത്രക്രിയയിലൂടെ വെടിയുണ്ട പുറത്തെടുത്തു. മൂന്നര മണിക്കൂറാണ് ശസ്ത്രക്രിയ നീണ്ടത്. ഏതാനും ദിവസം മുമ്പ് ഭക്ഷണത്തിലൂടെ നേരിയ ഇരുമ്പ് കമ്പി ഉള്ളില് കടന്ന നിലയില് ആശുപത്രിയിലെത്തിയ മറ്റൊരു യുവാവിനെ കാര്ഡിയോ തൊറാസിക് വിഭാഗത്തിലെ ഡോക്ടര്മാര് സങ്കീര്ണമായ ശസ്ത്രക്രിയയിലൂടെ രക്ഷപ്പെടുത്തിയതും തിരുവനന്തപുരം മെഡിക്കല് കോളജ് ആശുപത്രിയുടെ യശസ് ഉയര്ത്തിയ സംഭവമാണ്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ