പാലക്കാട്: വീട്ടിൽ ഉറങ്ങുകയായിരുന്ന യുവതിക്കു നേരെ ഭർത്താവിന്റെ ആസിഡ് ആക്രമണം. പാലക്കാട് നഗരത്തിനു സമീപം ജൈനിമേട് നൂർജഹാനാസിൽ റാബിന്നീസയ്ക്കാണു (36) പൊള്ളലേറ്റത്. ഭർത്താവ് സഹാബുദീനെതിരെ ടൗൺ നോർത്ത് പൊലീസ് കേസെടുത്തു. ഇയാൾ ഒളിവിലാണ്.
മുഖത്തും ദേഹത്തും 30 ശതമാനം പൊള്ളലേറ്റ വീട്ടമ്മയെ ആദ്യം ജില്ലാ ആശുപത്രിയിലും പിന്നീടു തൃശൂർ മെഡിക്കൽ കോളജ് ആശുപത്രിയിലും പ്രവേശിപ്പിച്ചു. ഇവരോടൊപ്പം കിടന്ന മകൾക്കും നേരിയ പൊള്ളലേറ്റിട്ടുണ്ട്.
വെള്ളിയാഴ്ച പുലർച്ചെയായിരുന്നു സംഭവം.കോയമ്പത്തൂരിൽ സ്വകാര്യ കമ്പനി ജീവനക്കാരനായ ഇയാൾ തമിഴ്നാട്ടിലേക്കു കടന്നതായി പൊലീസിനു വിവരം ലഭിച്ചു. കുടുംബവഴക്കാണ് അക്രമത്തിനു പിന്നിലെന്നു സംശയിക്കുന്നു. മറ്റൊരു മുറിയിൽ കിടന്ന സഹാബുദീൻ ഭാര്യയുടെ മുറിയിലെത്തി മുഖത്തേക്ക് ആസിഡ് ഒഴിക്കുകയായിരുന്നെന്ന് പൊലീസ് പറഞ്ഞു. സംഭവസമയം ഇവരുടെ മകനും വീട്ടിലുണ്ടായിരുന്നു. നാട്ടുകാരാണ് ഇരുവരെയും ആശുപത്രിയിലെത്തിച്ചത്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ