കൊല്ലം: തിരുപ്പതി വെങ്കിടേശ്വര ക്ഷേത്രത്തിലെ പ്രസാദമായ ലഡ്ഡുവില്‍ ചേര്‍ക്കുന്നതിന്, ദേവസ്വവുമായുള്ള കരാര്‍ പ്രകാരം കാപ്പക്‌സ് അയച്ച കശുവണ്ടി തിരിച്ചയച്ചു. ഗുണനിലവാമില്ലെന്നു ചൂണ്ടിക്കാട്ടിയാണ് കൊല്ലത്തുനിന്ന് അയച്ച ആദ്യ ലോഡ് കശുവണ്ടി തിരിച്ചയച്ചതെന്ന് ന്യൂ ഇന്ത്യന്‍ എക്‌സ്പ്രസ് റിപ്പോര്‍ട്ട് ചെയ്യുന്നു.
സംസ്ഥാനത്തെ കശുവണ്ടി തൊഴിലാളികളുടെ അപ്പക്‌സ് സഹകരണ സംഘമായ കാപ്പക്‌സിനെ പുനരുദ്ധരിക്കുന്നതിനുള്ള ശ്രമങ്ങളിലെ നിര്‍ണായക ചുവടായാണ്, തിരുപ്പതി ദേവസ്വവുമായുള്ള കരാര്‍ വിലയിരുത്തപ്പെട്ടത്. ആദ്യ ലോഡ് കശുവണ്ടി തന്നെ തിരിച്ചയച്ചതോടെ പുനരുദ്ധാരണ ശ്രമങ്ങള്‍ക്കു തിരിച്ചടിയേറ്റതായി റിപ്പോര്‍ട്ടില്‍ പറയുന്നു.
ഗുണനിലവാരക്കുറവും പൊടിയും ഉള്ളതുകൊണ്ടാണ് കശുവണ്ടി തിരിച്ചയച്ചത്. ഇത്തരത്തിലുള്ള കശുവണ്ടി ഉപയോഗിച്ചാല്‍ ലഡ്ഡുവിന്റെ ഗുണനിലവാരത്തെ ബാധിക്കുമെന്നാണ് അധികൃതര്‍ ചൂണ്ടിക്കാട്ടിയിരിക്കുന്നത്. അഞ്ചു ടണ്‍ ആണ് ആദ്യ ലോഡില്‍ ഉണ്ടായിരുന്നത്.
ഒക്ടോബര്‍ മൂന്നിന് മന്ത്രി മേഴ്‌സിക്കുട്ടിയമ്മ ഫ്‌ലാഗ് ഓഫ് ചെയ്താണ് തിരുപ്പതിയിലേക്ക് കാപ്പക്‌സ് കശുവണ്ടി ലോഡ് അയച്ചത്. അതേസമയം കാഷ്യു കോര്‍പ്പറേഷന്‍ അയച്ച കശുവണ്ടി തിരുപ്പതി ക്ഷേത്രം അധികൃതര്‍ കൈപ്പറ്റിയിട്ടുണ്ട്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
