കോഴിക്കോട്: എലത്തൂരിലെ ഓട്ടോ ഡ്രൈവറുടെ ആത്മഹത്യ ശ്രമവുമായി ബന്ധപ്പെട്ട കേസില് രണ്ട് സിപിഎം പ്രവര്ത്തകര് പിടിയിലായി. സിപിഎം പ്രാദേശിക നേതാവും മുന് പഞ്ചായത്ത് അംഗവുമായ ഒകെ ശ്രീലേഷ്, ഷൈജു എന്നിവരെയാണ് പുതിയനിരത്ത് നിന്ന് പൊലീസ് പിടികൂടിയത്. സ്റ്റാന്റില് ഓട്ടോ ഓടിക്കാന് സമ്മതിക്കാതെ ഭീഷണിപ്പെടുത്തിയതിനെ തുടര്ന്നാണ് ഓട്ടോ ഡ്രൈവര് രാജേഷ് ആത്മഹത്യയ്ക്ക് ശ്രമിച്ചത്.
സിപിഎം പ്രവര്ത്തകരുടെ മര്ദനമേറ്റതിന് പിന്നാലെയാണ് ഇയാള് ആത്മഹത്യക്ക് ശ്രമിച്ചത്. ബിജെപി പ്രവര്ത്തകനായ രാജേഷ് കോഴിക്കോട് മെഡിക്കല് കോളജ് ആശുപത്രിയില് ഗുരുതരാവസ്ഥയില് കഴിയുകയാണ്. സംഭവത്തില് സിപിഎം പ്രാദേശിക നേതാക്കള് ഉള്പ്പടെ പത്ത് പേര്ക്കെതിരെ പൊലീസ് കേസെടുത്തിരുന്നു.
ഞായറാഴ്ച വൈകിട്ടാണ് എലത്തൂരില് വച്ച് രജീഷിനെ സിപിഎം പ്രാദേശിക നേതാക്കള് അടങ്ങുന്ന സംഘം ആക്രമിച്ചത്. പരിക്കേറ്റ രാജേഷ് ഓട്ടോറിക്ഷയില് സൂക്ഷിച്ചിരുന്ന പെട്രോളൊഴിച്ച് ആത്മഹത്യക്ക് ശ്രമിക്കുകയായിരുന്നു. ഗുരുതരമായി പൊള്ളലേറ്റ് ബീച്ച് ആശുപത്രിയില് പ്രവേശിപ്പിച്ച രാജേഷിനെ പിന്നീട് മെഡിക്കല് കോളജ് ആശുപത്രിയിലേക്ക് മാറ്റുകയായിരുന്നു.
രജേഷ് എലത്തൂരില് ഓട്ടോറിക്ഷ ഓടിക്കുന്നത് സിഐടിയു അംഗങ്ങളായ ഓട്ടോറിക്ഷ തൊഴിലാളികള് വിലക്കിയിരുന്നു. ഇതേ ചൊല്ലിയുള്ള തര്ക്കമാണ് മര്ദനത്തില് കലാശിച്ചത്. ഒ കെ ശ്രീലേഷിന്റെ നേതൃത്വത്തിലുളള സംഘമാണ് ആക്രമിച്ചതെന്നും ഇവരില് നിന്ന് നാളുകളായി ഭീഷണിയുണ്ടായിരുന്നെന്നും ചൂണ്ടികാട്ടി രജീഷിന്റെ ഭാര്യ രജീഷ പൊലീസിന് പരാതി നല്കിയിരുന്നു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ