തിരുവനന്തപുരം; സസ്പെന്ഷനിലായ ജേക്കബ് തോമസ് ഐപിഎസിന് വീണ്ടും നിയമനം. വ്യാവസായ വകുപ്പിന് കീഴിലെ കേരള സ്റ്റീല് അന്റ് മെറ്റല് ഇന്ഡസ്ട്രീസ് കോര്പ്പറേഷന് എംഡിയായാണ് നിയമനം. ഫയലില് മുഖ്യമന്ത്രി പിണറായി വിജയന് ഒപ്പിട്ടു.
സംസ്ഥാന സര്ക്കാര് മൂന്നുവട്ടം സസ്പെന്ഡ് ചെയ്ത ഡിജിപി ജേക്കബ് തോമസിനെ അടിയന്തരമായി സര്വീസില് തിരിച്ചെടുക്കാന് കേന്ദ്ര അഡ്മിനിസ്ട്രേറ്റീവ് ട്രിബ്യൂണല് ജൂലായില് ഉത്തരവിട്ടിരുന്നു. എന്നാല് ട്രിബ്യൂണല് ഉത്തരവ് പുറപ്പെടുവിച്ചിട്ടും അദ്ദേഹത്തിന്റെ നിയമനം വൈകുകയായിരുന്നു. ഇതിനിടെ തന്റെ സീനിയോറിറ്റിയും കേഡര് റൂള്സും അനുസരിച്ചുള്ള നിയമനമാണ് നല്കുന്നതെങ്കില് പരിഗണിക്കാമെന്നായിരുന്നു ജേക്കബ് തോമസിന്റെ പ്രതികരണം.
നിയമനം വൈകിയാല് ജേക്കബ് തോമസ് വീണ്ടും കോടതിയെ സമിപിച്ചാല് സര്ക്കാരിന് തിരിച്ചടിയാകുമോയെന്ന ആശങ്കയിലാണ് നിയമനം നടത്താനുള്ള സര്ക്കാരിന്റെ തീരുമാനം. പൊലീസില് ഒഴിവില്ലെങ്കില് തത്തുല്യമായ തസ്തികയില് നിയമിക്കണമെന്നായിരുന്നു ട്രിബ്യൂണലിന്റെ നിര്ദേശം. ഇതനുസരിച്ചാണ് വ്യവസായ വകുപ്പിന് കീഴിലെ ഷൊര്ണ്ണൂരിലെ സ്റ്റീല് ആന്ഡ് മെറ്റല് ഇന്ഡസ്ട്രീസ് എം.ഡി.യായി ജേക്കബ് തോമസിനെ നിയമിച്ചിരിക്കുന്നത്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ