തിരുവനന്തപുരം: മുഖ്യമന്ത്രി പിണറായി വിജയന്റേയും ആരോഗ്യ മന്ത്രി കെകെ ശൈലജ ടീച്ചറുടേയും കോവിഡ് പരിശോധനാ ഫലം നെഗറ്റീവ്. മലപ്പുറം കലക്ടർ കെ ഗോപാലകൃഷ്ണന് കോവിഡ് സ്ഥിരീകരിച്ചതിന്റെ പശ്ചാത്തലത്തിൽ മുഖ്യമന്ത്രി സ്വയം നിരീക്ഷണത്തിൽ പ്രവേശിച്ചിരുന്നു. മുഖ്യമന്ത്രിക്കൊപ്പം ആരോഗ്യ മന്ത്രിയും നിരീക്ഷണത്തിൽ പോയിരുന്നു.
ഇതിന് പിന്നാലെ നടത്തിയ ആന്റിജൻ പരിശോധനയിലാണ് കോവിഡ് ഫലം നെഗറ്റീവായത്. മുഖ്യമന്ത്രി നിരീക്ഷണത്തിൽ തുടരും.
മുഖ്യമന്ത്രിക്കൊപ്പം കരിപ്പൂരിൽ വിമാനാപകട സ്ഥലം സന്ദർശിച്ച സ്പീക്കറും മന്ത്രിമാരും നിരീക്ഷണത്തിൽ പ്രവേശിച്ചിട്ടുണ്ട്. സ്പീക്കർ പി ശ്രീരാമകൃഷ്ണനും മന്ത്രിമാരായ വിഎസ് സുനിൽകുമാർ, ഇ ചന്ദ്രശേഖരൻ, എസി മൊയ്തീൻ, കെകെ ശൈലജ, കെടി ജലീൽ, ഇപി ജയരാജൻ, കടന്നപ്പള്ളി രാമചന്ദ്രൻ എന്നിവരാണ് നിരീക്ഷണത്തിൽ പ്രവേശിച്ചത്.
മുഖ്യമന്ത്രിയും മന്ത്രിമാരും കരിപ്പൂരിലെ അപകട സ്ഥലം സന്ദർശിച്ച സമയത്ത് മലപ്പുറം ജില്ലാ കലക്ടറും ഇവർക്കൊപ്പമുണ്ടായിരുന്നു. മുഖ്യമന്ത്രി സ്വയം നിരീക്ഷണത്തിലായതോടെ നാളെ നടക്കുന്ന സ്വാതന്ത്ര്യ ദിനാഘോഷ ചടങ്ങിൽ മുഖ്യമന്ത്രിക്ക് പകരം മന്ത്രി കടകംപള്ളി സുരേന്ദ്രൻ പങ്കെടുക്കും.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
