വന്ദേ ഭാരത് മിഷൻ; കൊച്ചി- ലണ്ടൻ വിമാന സർവീസുമായി എയർ ഇന്ത്യ

കൊച്ചി: വന്ദേ ഭാരത് മിഷന്റെ ഭാഗമായി എയർ ഇന്ത്യ കൊച്ചിയിൽ നിന്നു നേരിട്ട് ലണ്ടനിലേക്കും തിരിച്ചും വിമാന സർവീസ് നടത്തും. ഈ മാസം 28 മുതൽ അടുത്ത മാസം 27 വരെയാണ് സർവീസുകൾ. ആഴ്ചയിൽ രണ്ട് സർവീസുകളാണ് ഉണ്ടാകുക. 

ഞായറാഴ്ച പുലർച്ചെ 12.15ന് ലണ്ടനിൽ നിന്നു കൊച്ചിയിലെത്തുന്ന വിമാനം ഉച്ചയ്ക്കു 12.20ന് മടങ്ങും. വെള്ളിയാഴ്ച പുലർച്ചെ നാലിന് എത്തുന്ന രണ്ടാമത്തെ സർവീസ് രാവിലെ ആറിന് മടങ്ങും. 

അതിനിടെ വിദേശത്തു നിന്നു കൊച്ചിയിലേക്ക് ഇന്നു 12 വിമാനങ്ങൾ സർവീസ് നടത്തും. എമിറേറ്റ്സിന്റെ ദുബായ്, എയർ അറേബ്യയുടെ ഷാർജ വിമാനങ്ങൾ പുലർച്ചെയെത്തും. ഖത്തർ എയർവേയ്സിന്റെ 3 ദോഹ വിമാനങ്ങളിൽ ആദ്യത്തേത് രാവിലെ 10.15നും രണ്ടാമത്തേതു രാത്രി 7.30നും മൂന്നാമത്തേത് 8.30നുമെത്തും. ഇൻഡിഗോയുടെ മാലി വിമാനം രാവിലെ 11.30ന് വരും. 

എയർ ഇന്ത്യ എക്സ്പ്രസിന്റെ ദുബായ് വിമാനം വൈകീട്ട് 5.35നെത്തും. കുവൈത്ത് എയർവേയ്സിന്റെ കുവൈത്ത് വിമാനം 6.15നും ഇൻഡിഗോയുടെ ദുബായ് വിമാനം രാത്രി എട്ടിനും നെടുമ്പാശ്ശേരി എത്തു. ഇൻഡിഗോയുടെ ദോഹ വിമാനം 9.25നും ദമാം വിമാനങ്ങൾ 10നും 10.55നുമാണ് എത്തുന്നത്.