തിരുവനന്തപുരം: ഓണക്കാലം കണക്കിലെടുത്ത്‌ സംസ്ഥാനത്ത് പൊതുഗതാഗതത്തിന് ഏർപ്പെടുത്തിയിരുന്ന നിയന്ത്രണങ്ങൾ താത്കാലികമായി ഒഴിവാക്കി. സെപ്റ്റംബർ ഒന്ന് വരെയാണ് നിയന്ത്രണം ഒഴിവാക്കിയത്. ഇതോടെ സംസ്ഥാനത്ത് എവിടേക്കും സർവീസ് നടത്തുന്നതിന് ബസുകൾക്ക് നിയന്ത്രണമുണ്ടാവില്ല.
നേരത്തെ തൊട്ടടുത്ത ജില്ലകളിലേക്ക് മാത്രമാണ് സർവീസ് നടത്താൻ അനുമതിയുണ്ടായിരുന്നത്. പുതിയ നിർദേശത്തിൽ രാവിലെ ആറ് മുതൽ രാത്രി പത്ത് വരെ സർവീസ് നടത്താമെന്നും അറിയിച്ചിട്ടുണ്ട്. കെഎസ്ആർടിസിയുടെ ദീർഘദൂര സർവീസുകൾ നാളെ ആരംഭിക്കും.
കോവിഡ് പ്രതിസന്ധി പരിഗണിച്ച് സംസ്ഥാനത്തെ സ്വകാര്യ ബസുകൾക്ക് നികുതിയിളവ് അനുവദിച്ച് കഴിഞ്ഞ ദിവസം മന്ത്രിസഭാ തീരുമാനം വന്നിരുന്നു. ജൂലായ് മുതൽ സെപ്റ്റംബർ വരെയുള്ള നികുതികൾ ഒഴിവാക്കി നൽകുമെന്ന് ഗതാഗത മന്ത്രിയും അറിയിച്ചു. സ്‌കൂൾ ബസുകളുടെ നികുതിയും ഒഴിവാക്കിയിട്ടുണ്ട്.
ചാർജ് വർധിപ്പിച്ചിട്ടും നഷ്ടമാണെന്ന് ചൂണ്ടിക്കാട്ടി സ്വകാര്യ ബസുകൾ ഭൂരിഭാഗവും സർവീസ് നിർത്തിവെച്ചിരിക്കുകയായിരുന്നു. ഇനി നിസ്സഹകരണം തുടരാൻ പാടില്ലെന്നും മന്ത്രി അറിയിച്ചിട്ടുണ്ട്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
