തിരുവനന്തപുരം: പാമ്പുപിടിത്തത്തിനിടെ പാമ്പിന്റെ കടിയേറ്റ് തിരുവനന്തപുരം മെഡിക്കല് കോളജില് തീവ്രപരിചരണ വിഭാഗത്തില് തുടരുന്ന വാവാ സുരേഷിന്റെ ആരോഗ്യനില തൃപ്തികരമെന്ന് ആശുപത്രി അധികൃതര്. ആന്റിവെനം നല്കി വരികയാണെന്നും 72 മണിക്കൂര് നിരീക്ഷണത്തില് തുടരുമെന്നും ആശുപത്രി സൂപ്രണ്ട് എംഎസ് ഷര്മ്മദ് അറിയിച്ചു.
അണലിയുടെ കടിയേറ്റതിനെ തുടര്ന്ന് ഇന്ന് ഉച്ചയ്ക്ക ശേഷമാണ് വാവ സുരേഷിനെ തിരുവനന്തപുരം മെഡിക്കല് കോളജില് പ്രവേശിപ്പിച്ചത്. ഒരു വീട്ടിലെ കിണറില്നിന്നും പിടിച്ച അണലിയാണ് വാവ സുരേഷിനെ കടിച്ചത്. രാവിലെ പത്തനംതിട്ട കലഞ്ഞൂര് ഇടത്തറ ജങ്ഷനില് വെച്ചാണ് സംഭവം.
കല്ലറേത്തെ ഒരു വീട്ടില്നിന്നും കുപ്പിയിലാക്കിക്കൊണ്ടുപോയ അണലിയെ കാണാന് നാട്ടുകാര് ആഗ്രഹം പ്രകടിപ്പിച്ചതനുസരിച്ച് പുറത്തെടുക്കുന്നതിനിടെയാണ് വാവ സുരേഷിന്റെ കൈയില് കടിയേറ്റത്. കൈവശമുണ്ടായിരുന്ന മരുന്നുപയോഗിച്ച് പ്രഥമശുശ്രൂഷ നടത്തിയശേഷം നാട്ടുകാര് ആശുപത്രിയിലെത്തിക്കുകയായിരുന്നു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ