കൊച്ചി: കേരളാ പൊലീസിലെ വെടിയുണ്ടകള് കാണാതായ സംഭവത്തില് സിബിഐ അന്വേഷണം ആവശ്യപ്പെട്ടുള്ള ഹര്ജി ഹൈക്കോടതി തള്ളി. മാധ്യമ വാര്ത്തകളെ അടിസ്ഥാനമാക്കി കേസ് എടുക്കാനാവില്ലെന്ന് ഹൈക്കോടതി വ്യക്തമാക്കി.
പൊതുപ്രവര്ത്തകനായ ജോര്ജ്ജ് വട്ടുകുളം ആണ് സിബിഐ അന്വേഷണം ആവശ്യപ്പെട്ട് ഹൈക്കോടതിയെ സമീപിച്ചത്. അപേക്ഷകന്റെ ഹര്ജി മാധ്യമവാര്ത്തയുടെ അടിസ്ഥാനത്തിലാണെന്ന് കോടതി നീരീക്ഷിച്ചു. ഈ വിഷയത്തില് ആഭ്യന്തരവകുപ്പ് അന്വേഷണം നടക്കുകയാണെന്നും കോടതി ചൂണ്ടിക്കാട്ടി.
വെടിയുണ്ട കാണാതായതുമായി ബന്ധപ്പെട്ട ഫയലുകള് മുദ്രവച്ച കവറില് ഹൈക്കോടതിയില് സമര്പ്പിക്കണമെന്നായിരുന്നു ഹര്ജിയിലെ ആവശ്യം. നിലവിലെ പൊലീസ് അന്വേഷണം തൃപ്തികരമല്ലെന്നും ഹര്ജിയില് പറയുന്നു. പൊലീസിന്റെ പക്കലുണ്ടായിരുന്ന 12,061 വെടിയുണ്ടകള് കാണാനില്ലെന്ന സിഎജി റിപ്പോര്ട്ടിന്റെ അടിസ്ഥാനത്തിലാണ് പരാതിക്കാരന് ഹൈക്കോടതിയെ സമീപിച്ചത്.
അതേസമയം കേസ് സിബിഐയോ, എന്ഐഎയോ അന്വേഷിക്കണമെന്നാവശ്യപ്പെട്ട് പുതിയ ഹര്ജി കൂടി ഹൈക്കോടതിയില് സമര്പ്പിച്ചു. കോട്ടയം സ്വദേശിയായ രഘുചന്ദ്രകൈമളാണ് പുതിയ ഹര്ജി നല്കിയത്.
കേരളാ പൊലീസിന്റെ ആയുധശേഖരത്തില് നിന്ന് വന്തോതില് വെടിക്കോപ്പുകളും ഉണ്ടകളും റൈഫിളുകളും കാണാതായെന്നാണ് സിഎജിയുടെ കണ്ടെത്തല്. 12,061 വെടിയുണ്ടകളുടെ കുറവാണ് കണ്ടെത്തിയിരിക്കുന്നത്. കാണാതായവയ്ക്ക് പകരം വ്യാജ വെടിയുണ്ടകള് വയ്ക്കുകയും സംഭവം മറച്ചു വയ്ക്കാന് ഉദ്യോഗസ്ഥര് ശ്രമിക്കുകയും ചെയ്തതായും സിഎജി റിപ്പോര്ട്ടില് പറയുന്നു. ചൂണ്ടിക്കാട്ടിയിരുന്നു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ