ഒന്നോ രണ്ടോ വിഷയങ്ങൾക്ക് തോറ്റാലും ഒരുവർഷം നഷ്ടമാകില്ല; എംബിബിഎസിനും സേ പരീക്ഷ

സിലബസ് പരിഷ്കരിക്കുന്നതിന്റെ ഭാഗമായി എംബിബിഎസ് പരീക്ഷാരീതിയിലും മാറ്റംവരുത്തുന്നു. ഒന്നോ രണ്ടോ വിഷയങ്ങൾക്ക് തോറ്റാലും വിദ്യാർഥികൾക്ക് ഒരുവർഷം നഷ്ടമാകാതിരിക്കാനുള്ള സേ പരീക്ഷ എംബിബിഎസിലും അവതരിപ്പിച്ചുകൊണ്ടാണ് പുതിയ പരിഷ്കരണം.

നിലവിൽ ഒന്നോ രണ്ടോ വിഷയങ്ങൾക്ക് തോൽക്കുന്നവരെ മറ്റൊരു ബാച്ചായാണ് പരി​ഗണിക്കുന്നത്. ഇത് വിദ്യാർഥികൾക്ക് മാനസിക സംഘർഷത്തിന് കാരണമാകുമെന്ന പരാതിയുടെ പശ്ചാതലത്തിലാണ് പുതിയ മാറ്റം നിർദേശിച്ചിരിക്കുന്നത്. ഒരവസരംകൂടി നൽകി വിദ്യാർത്ഥിയെ സ്വന്തം ബാച്ചിൽ തന്നെ നിലനിർത്തുന്നത് ഇതിന് പരിഹാരമാകുമെന്നാണ് കണ്ടെത്തൽ. മെഡിക്കൽ കൗൺസിലിന്റെതാണ് നിർദേശം.

ഓരോ വിഷയത്തിലും ഓരോ ഘട്ടത്തിലും വിദ്യാർഥികളുടെ പ്രാപ്തി വിലയിരുത്താൻ പരീക്ഷാരീതിയിലും മാറ്റം കൊണ്ടുവരും. പ്രായോഗിക പരിശീലനത്തിനും അതുവഴി വിദ്യാർഥികളുടെ കാര്യപ്രാപ്തി ഉയർത്താനും ലക്ഷ്യമിട്ടായിരിക്കും പുതിയ പാഠ്യപദ്ധതി. പരിഷ്കരണം 2024-ഓടെ പൂർത്തിയാക്കും.